નાનામવા પાસે આંબેડકરનગરમાં રહેતા રવિ બથવાર (ઉ.વ.27)એ એમ.જી. હોસ્ટેલમાં રહેતા ગૌતમ સોલંકી સહિતનાઓ સામે તાલુકા પોલીસમાં ફરિયાદ નોંધાવી
(આઝાદ સંદેશ),રાજકોટ: નાનામવાના આંબેડકરનગર-2, શેરી નં.6માં રહેતા અને ડ્રાઇવિંગ કરતા યુવાન સાથે લારીએ પહેલા જમવાનું મળવા બાબતે ચાર શખ્સોએ બોલાચાલી કરી, પીવીસીના પાઈપ વડે હુમલો કરી, છરી બતાવી, જાનથી મારી નાખવાની ધમકી આપ્યાની ફરિયાદ તાલુકા પોલીસ મથકમાં નોંધાઇ છે. ફરિયાદમાં રવિભાઈ મનસુખભાઇ બથવાર (ઉ.27)એ જણાવ્યું છે કે ગઇકાલે બપોરે એજી ચોક પાસે હોકર્સ ઝોનમાં આવેલી લારીમાં જમવા ગયો હતો. તે વખતે તેનાથી દૂર ટેબલ ઉપર છ-સાત જણાનું ગ્રુપ જમવા આવ્યું હતું. જેમણે છાસનો ઓર્ડર કર્યો હતો. આ પછી તેણે પણ છાસનો ઓર્ડર કર્યો હતો. જેમાંથી તેને પહેલા છાસ મળતાં દૂર ટેબલ પર બેઠેલા ગ્રુપના એક માણસે તેની સામે જોઈ ગાળો ભાંડવાનું શરૂ કર્યું હતું. સાથોસાથ કહ્યું કે તને કેમ પહેલા જમવાનું આપે છે, તારા કરતાં પહેલા અમે આવ્યા છીએ, જેથી પહેલા અમને આપવું જોઈએ. તેણે ગાળાગાળી કરવાની ના પાડતા તે શખ્સે ઉશ્કેરાઈ જઈ તેને તમાચો ઝીંકી દીધો હતો. ત્યાર પછી બંને વચ્ચે ઝપાઝપી થઇ હતી. તે વખતે તે શખ્સે પ્લાસ્ટિકની ખુરશી તેના માથાના ભાગે ઝીંકી દેતા ચક્કર આવી ગયા હતા. એવામાં બીજા ત્રણ શખ્સો પણ ત્યાં આવી ગયા હતા અને તેની ઉપર પીવીસીના પાઇપ વડે હુમલો કરી દીધો હતો. તે જીવ બચાવી ભાગવા જતાં એક શખ્સે છરી બતાવી જાનથી મારી નાખવાની ધમકી આપી હતી. સાથોસાથ છરી મારવાની કોશિષ કરતાં તેનો શર્ટ ફાટી ગયો હતો. દેકારો થતાં માણસો ભેગા થઈ જતાં ચારેય શખ્સો ભાગી ગયા હતા. આ પછી તેણે પોલીસ કંટ્રોલ રૂમમાં કોલ કર્યો હતો. 108 બોલાવી તેમાં સિવિલમાં સારવાર લીધી હતી. જ્યાં તબીબે જમણો હાથ ઉતરી ગયાનું જણાવ્યું હતું. શરીરે મૂંઢ ઇજાઓ અને છોલછાલ પણ થઇ હતી. એક શખ્સનો મોબાઈલ ફોન સ્થળ પરથી મળ્યો હતો. જેના પરથી તેનું નામ ગૌતમ સોલંકી હોવાનું અને એમ.જી. હોસ્ટેલમાં રહેતો હોવાનું માલુમ પડ્યું હતું.જેથી તેના અને ત્રણ અજાણ્યા શખ્સો સામે ફરિયાદ નોંધાવી હતી.
