ભોજન સમારોહ, લોકડાયરાનું આયોજન : મુખ્યમંત્રી, ગૃહમંત્રી સહિતના આગેવાનો હાજરી આપશે : પત્રકાર પરિષદ યોજાઈ
અમારા પરિવારનો નહીં પણ સમગ્ર ગોંડલના નગરજનોનો રૂડો અવસર : જ્યોતિરદિત્યસિંહ
(આઝાદ સંદેશ),રાજકોટ: ગોંડલ ખાતે ધારાસભ્ય ગીતાબા તથા પૂર્વ ધારાસભ્ય જયરાજસિંહ જાડેજા, જ્યોતિરાદિત્યસિંહ જાડેજા પરિવાર દ્વારા ભવ્ય તુલસી વિવાહનું આયોજન કરવામાં આવ્યું છે. આ અલૌકિક અવસરને લઈને તડામાર તૈયારી કરવામાં આવી છે. આવતીકાલે યોજાનાર તુલસી વિવાહના કાર્યક્રમને લઈને ગોંડલ આશાપુરા રોડ પર આવેલા ધારાસભ્યના નિવાસ સ્થાનેથી લઇ કોલેજ ચોક સંગ્રામસિંહજી હાઈસ્કૂલ સુધીના સમગ્ર વિસ્તારને શણગારવામાં આવ્યો છે. તુલસી વિવાહના કાર્યકમને લઈને ધારાસભ્ય ગીતાબા, પૂર્વ ધારાસભ્ય જયરાજસિંહ જાડેજા, જ્યોતિરાદિત્યસિંહ જાડેજા, નાગરીક બેન્કના ચેરમેન અશોકભાઈ પીપળીયા, ઉપેન્દ્રસિંહ ચુડાસમા, સમીર કોટડીયા સહિતના ભાજપના આગેવાનો અને કાર્યકર્તાઓ દ્વારા કાર્યક્રમ સ્થળની સમીક્ષા કરવામાં આવી હતી. અક્ષરધામ સોસાયટી સ્થિત ધારાસભ્યના નિવાસસ્થાન ‘ગીતાવીલા’ ખાતે તુલસી વિવાહનો કાર્યક્રમ સંપન થશે. ત્યાર બાદ રીવર સાઇડ પેલેસ ખાતે ભોજન સમારોહ અને રાત્રે કોલેજ ચોક સંગ્રામસિંહ હાઈસ્કૂલના મેદાનમાં લોકડાયરાનું ભવ્ય આયોજન કરાયું છે. લોકડાયરામાં કીર્તિદાન ગઢવી, કિંજલ દવે, બિરજુભાઈ બારોટ, દેવાયતભાઈ ખવડ, ધીરુભાઈ સરવૈયા અને જીતુદાન ગઢવી સહિતના કલાકારો પોતાની વાણી પીરસશે.આ તુલસી વિવાહમાં મુખ્યમંત્રી ભુપેન્દ્રભાઈ પટેલ, કેન્દ્રીય મંત્રી મનસુખભાઈ માંડવીયા, રાજ્યનાં ગૃહમંત્રી હર્ષભાઈ સંઘવી, કેબીનેટ મંત્રી કુંવરજીભાઇ બાવળીયા, ભાનુબેન બાબરીયા, રાઘવજીભાઇ પટેલ, પૂર્વ મુખ્યમંત્રી વિજયભાઈ રૂપાણી, ગુજરાત સરકારનાં ઉપદંડક કૌશિકભાઈ વેકરીયા, સાંસદ પરસોત્તમભાઈ રૂપાલા, પુનમબેન માડમ, રામભાઈ મોકરીયા સહિતનાઓ ઉપસ્થિત રહેશે. આ તકે પત્રકાર પરિષદમાં ગોંડલના ધારાસભ્યના પુત્ર જ્યોતિરાદિત્યસિંહ જાડેજા (ગણેશભાઈ) એ જણાવ્યું હતું કે ગોંડલના આંગણે આ રૂડા અવસરમાં ગોંડલ શહેર તેમજ આસપાસના ગામોના તમામ સરપંચો તેમજ મોટી સંખ્યામાં ગ્રામજનો ઉપસ્થિત રહેશે આ કાર્યકમ માત્ર અમારા પરિવારો જ નહીં પણ સમગ્ર ગોંડલના નગરજનોનો છે. ગોંડલના નગરજનો તથા અમારા પરિવાર વતી આ કાર્યક્રમમાં ઉપસ્થિત રહેવા ગોંડલ તેમજ આસપાસના ગામોના તમામ ગામના લોકોને અને સમગ્ર ગુજરાતના ધર્મપ્રેમી લોકોને આજે હું આમંત્રણ પાઠવું છું.
