સૌથી વધુ મોરબી તાલુકાના 8 હેડ કોન્સ્ટેબલ અને કોન્સ્ટેબલની બદલી કરાઈ
(આઝાદ સંદેશ),રાજકોટ: મોરબી જિલ્લાના ટંકારા નજીકની હોટલ કમ્ફર્ટ ઈનમાં હાઈપ્રોફાઈલ જુગાર કલબમાં તપાસની સાથે બે દરોડા બાદ આચરાયેલા ખાખીના તોડકાંડનો પર્દાફાશ થયા બાદ પોલીસ સામે પોલીસે કાર્યવાહી હાથ ધરી સાફસૂફી શરૂ કરી છે. સ્થાનિક પોલીસની ઢીલી કામગીરી ખુલ્લી પડતા જિલ્લા પોલીસ વડાએ જિલ્લાના 7 પીએસઆઈ અને 11 પોલીસ કર્મીઓની બદલીના હુકમ કર્યા છે.
મોરબી જિલ્લા પોલીસ વડાએ 7 પીએસઆઈની બદલી કરવામાં આવી છે. જેમાં ટંકારા પીએસઆઈ એમ. જે.ધાંધલની હળવદ, સિટી એ ડિવિઝનના પી.આર.સોનારાની એલઆઈબી મોરબી, એલઆઈબી મોરબીના જે.એલ.ઝાલાની વાંકાનેર સિટી, વાંકાનેર સિટીના ડી.વી. કાનાણીની હળવદ, એસસીએસટી સેલના કે.એચ.અંબારિયાની હળવદ, સિટી એ ડિવિઝનના બી.એ.ગઢવીની સિટી બી ડિવિઝન, આઈયુસીએડબ્લ્યુ એસ.વી.સામાણીની સિટી બી ડિવિઝનમાં બદલી કરાઈ છે.
બીજી તરફ 11 પોલીસ કર્મીઓની બદલી કરાઈ છે. જેમાં મોરબી તાલુકાના હેડ કોન્સ્ટેબલ વિજયકુમાર સુખાભાઈ ડાંગરની વાંકાનેર તાલુકા, હેડ કોન્સ્ટેબલ જનકસિંહ બટુકભા પરમારની વાંકાનેર સિટી, કોન્સ્ટેબલ કિશોરકુમાર મુળજીભાઈ દાવાની ટંકારા, વનરાજભાઈ કાનાભાઈ ચૌહાણની હળવદ, રવિરાજ શક્તિસિંહ પરમારની માળિયા મિયાણા, મયુર જલાભાઈ ચાવડાની હળવદ, વિજયકુમાર દેવદાનભાઈ સવસેટાની વાંકાનેર સિટી, લકીરાજ ચંદુલાલ લોખીલની હેડ ક્વાર્ટર, મોરબી સિટી બી ડિવિઝન પોલીસ સ્ટેશનના એએસઆઈ પ્રફુલકુમાર જેઠાભાઈ પરમારની વાંકાનેર સિટી, અશોક રત્નાભાઈ શારદિયાની ટંકારા તથા હેડ કોન્સ્ટેબલ વિજયભાઈ પરબતભાઈ ચાવડાની હળવદ બદલી કરાઈ છે.
