ભારત, અમેરિકા, ઓસ્ટ્રેલિયા, કેનેડા, જાપાન સહિત વિશ્વભરમાં સેંકડો ફ્લાઈટ્સ રદ વિશ્ર્વભરની બેંકો સહિતના અનેક વ્યવસાયોને અસર : વિશ્વભરના વપરાશકર્તાઓ ચિંતિત : વિન્ડોઝ સિસ્ટમમાં બ્લુ સ્ક્રીન ઓફ ડેથ એરરના કારણે સિસ્ટમ અચાનક બંધ
(આઝાદ સંદેશ) નવી દિલ્હી : માઈક્રોસોફ્ટ ક્લાઉડના આઉટેજને કારણે સમગ્ર વિશ્ર્વ ઠપ્પ થઈ ગયું છે. તેનું મુખ્ય કારણ એ છે કે વિશ્ર્વભરની તમામ બેંકો, વ્યવસાયો, એરલાઇન્સ ક્લાઉડ સર્વર પર નિર્ભર છે. માઈક્રોસોફ્ટ ક્લાઉડ ડાઉન થવાને કારણે ભારત, અમેરિકા, ઓસ્ટ્રેલિયા, કેનેડા, જાપાન સહિત વિશ્ર્વભરમાં સેંકડો ફ્લાઈટ્સ રદ કરવામાં આવી છે અને ઘણી ફ્લાઈટ્સનો સમય બદલાઈ ગયો છે. એરલાઇન્સ કંપનીઓએ આ આઉટેજને કારણે સેવાઓમાં વિલંબ અંગે તેમના મુસાફરોને સલાહ આપી છે. ક્રાઉડસ્ટ્રાઈકના કારણે અબજો રૂપિયાનું નુકસાન થયું છે. અત્રે નોંધનીય છે કે, મોટાભાગની કંપનીઓ ક્લાઉડ સર્વરનો ઉપયોગ કરી રહી છે અને હાલમાં ક્લાઉડ સેવાઓ પ્રદાન કરતી ત્રણ મોટી કંપનીઓ છે જેમાં માઇક્રોસોફ્ટ, એમેઝોન અને ગૂગલનો સમાવેશ થાય છે. માઇક્રોસોફ્ટની વિન્ડોઝ ઓપરેટિંગ સિસ્ટમમાં મોટા બગના સમાચાર છે. આ બગને કારણે, વિશ્વભરના વિન્ડોઝ વપરાશકર્તાઓની સિસ્ટમ સ્ક્રીન વાદળી થઈ રહી છે. સોશિયલ મીડિયા પર લોકો સતત ફરિયાદ કરી રહ્યા છે. રિપોર્ટ અનુસાર, વિન્ડોઝ સિસ્ટમમાં બ્લુ સ્ક્રીન ઓફ ડેથ(બીએસઓડી) એરર દેખાઈ રહી છે, જેના કારણે સિસ્ટમને અચાનક બંધ કરવી પડે છે અથવા ફરીથી શરૂ કરવી પડે છે. રિપોર્ટ અનુસાર, આ બગને કારણે અમેરિકા, ઓસ્ટ્રેલિયા જેવા ઘણા દેશો પ્રભાવિત થયા છે અને તેના કારણે ઘણી મોટી બેંકોનું કામ પણ ઠપ થઈ ગયું છે. એવું કહેવામાં આવી રહ્યું છે કે માઇક્રોસોફ્ટના તાજેતરના ક્રાઉડસ્ટ્રાઇક અપડેટ પછી આ બગ આવ્યો છે. માઇક્રોસોફ્ટે હજુ સુધી આ બગ પર કોઈ સત્તાવાર નિવેદન જારી કર્યું નથી. આનાથી દુનિયાભરના યુઝર્સ સૌથી વધુ પ્રભાવિત થયા છે. હજુ સુધી એ સ્પષ્ટ નથી થયું કે આ બગ હાર્ડવેરને કારણે છે કે સોફ્ટવેરને કારણે, કારણ કે ઘણા યુઝર્સે એવું પણ કહ્યું છે કે તેમણે તાજેતરમાં નવું સોફ્ટવેર ઇન્સ્ટોલ કર્યું છે અને અપડેટ્સ પણ ઇન્સ્ટોલ કર્યા છે, તે પછી પણ તેમની સિસ્ટમમાં આ સમસ્યા આવી રહી છે. માઇક્રોસોફ્ટ પીસી અને ઘણી કંપનીઓને સાયબર સુરક્ષા સેવાઓ પ્રદાન કરતું પ્લેટફોર્મ ક્રાઉડસ્ટ્રાઇકના પતનને કારણે આ સમસ્યા થઈ રહી છે. ક્રાઉડસ્ટ્રાઇક વિન્ડોઝ પીસીને અદ્યતન સાયબર સુરક્ષા ઉકેલો પ્રદાન કરે છે. ક્રાઉડસ્ટ્રાઈક ડાઉન થવાને કારણે ભારત, અમેરિકા, કેનેડા, જાપાન સહિત વિશ્વના ઘણા દેશો પ્રભાવિત થયા છે. ક્રાઉડસ્ટ્રાઇક એ તેની વેબસાઇટ પર એક નિવેદનમાં જણાવ્યું હતું કે તે ફાલ્કન સેન્સર સંબંધિત વિન્ડોઝ હોસ્ટ્સ પર ક્રેશ થવાના અહેવાલોથી વાકેફ છે અને તેના એન્જિનિયરો તેને ઠીક કરવા પર કામ કરવાનું ચાલુ રાખી રહ્યા છે. માઈક્રોસોફ્ટ સર્વર ફેલ થવાના કારણે વિશ્ર્વભરની હવાઈ સેવાઓ પ્રભાવિત થઈ છે. ભારતમાં સ્પાઈસજેટે ટ્વિટર પર પોસ્ટ કર્યું કે તેઓ તેમના સેવા પ્રદાતા સાથે તકનીકી પડકારોનો અનુભવ કરી રહ્યા છે, જે બુકિંગ, ચેક-ઈન અને બુકિંગ કાર્યક્ષમતા સહિતની ઓનલાઈન સેવાઓને અસર કરી રહી છે. આ કારણોસર, સ્પાઈસ જેટે એરપોર્ટ પર મેન્યુઅલ ચેક-ઈન અને બોર્ડિંગ પ્રક્રિયા શરૂ કરી છે. ભારતમાં ઈન્ડિગો, સ્પાઈસ જેટ અને આકાશ એરલાઈન્સની સેવાઓને અસર થઈ છે. માઈક્રોસોફ્ટ ક્લાઉડ આઉટેજને કારણે ભારત ઉપરાંત અમેરિકામાં ફ્રન્ટિયર, એલિજિઅન્ટ અને સનકંટ્રી જેવી મોટી એરલાઈન્સની સેવાઓ ઠપ્પ થઈ ગઈ છે. રિપોર્ટ અનુસાર, આ આઉટેજને કારણે ફ્રન્ટિયરે 147 ફ્લાઈટ્સ કેન્સલ કરી છે અને 212 રિશેડ્યૂલ કરી છે. આ સિવાય એલિજિઅન્ટની 45 ટકા ફ્લાઈટ્સ મોડી પડી છે. સન ક્ધટ્રીની 23% ફ્લાઈટ્સ પણ મોડી પડી છે. બીજી તરફ માઈક્રોસોફ્ટ ક્લાઉડ આઉટેજના કારણે વિશ્ર્વની ઘણી બેંકોનું કામ પણ ઠપ થઈ ગયું છે. આ સિવાય જે ધંધાઓ ક્લાઉડ પર નિર્ભર હતા તેને પણ અસર થઈ છે. ઘણા મીડિયા હાઉસની વેબસાઈટ પણ ડાઉન હોવાના અહેવાલ છે. જેના કારણે ઘણા વ્યવસાયોના આઇટી નેટવર્કને અસર થઇ છે અને હજારો કરોડના વ્યવહારો ઠપ્પ થઇ ગયા છે.
