વર્ધમાનનગર વિસ્તારમાં આવેલી વર્ધમાન ગ્રીન રેસિડેન્સીની ઘટના : રેલનગરના મધુવન-1માં સાસરે રહેલી માનસીબેન આંબલિયા (ઉ.વ.23)એ પોતાના જન્મદિવસના આગલા દિવસે જ પગલું ભરી લેતાં અરેરાટી
રાજકોટ : રાજકોટના વર્ધમાનનગર વિસ્તારમાં આવેલી વર્ધમાન ગ્રીન રેસિડેન્સી ખાતે એક અત્યંત હૃદયદ્રાવક અને આઘાતજનક ઘટના સામે આવી છે, જેમાં ૨૩ વર્ષીય પરિણીતાએ પોતાના ૨૪મા જન્મદિવસના બરાબર એક દિવસ પહેલાં જ ઈમારતના નવમા માળેથી પડતું મૂકીને જીવન ટૂંકાવી લીધું છે. પતિ સામે “તમે મને પૂરતો સમય નથી આપતા” તેવી બાબતે થયેલા તીવ્ર ઝઘડા અને માનસિક તણાવ બાદ પરિણીતાએ આ આત્મઘાતી પગલું ભર્યું હોવાનું પ્રાથમિક તપાસમાં ખૂલ્યું છે. આ બનાવથી બંને પરિવારમાં અરેરાટી સાથે ભારે શોકનું મોજું ફરી વળ્યું છે.
મળતી વિગતો મુજબ, રાજકોટના રેલનગરમાં આવેલ મધુવન-૧માં રહેતી માનસીબેન મિલનભાઈ આંબલીયા (ઉં.વ. ૨૩) પોતાના પિયર વર્ધમાનનગરમાં આવેલ વર્ધમાન ગ્રીન રેસિડેન્સી ખાતે હતી ત્યારે આ બનાવ બન્યો હતો. પરિણીતાએ નવમા માળેથી ઝંપલાવતા જ આસપાસના લોકો તાત્કાલિક એકઠા થઈ ગયા હતા અને તેને સારવાર માટે નજીકની એઈમ્સ હોસ્પિટલ ખાતે ખસેડવામાં આવી હતી. જોકે, હોસ્પિટલ પહોંચે તે પહેલાં જ ગંભીર ઈજાઓને કારણે તેનું કમકમાટીભર્યું મોત નીપજ્યું હતું. બનાવની જાણ થતાં જ યુનિવર્સિટી પોલીસ મથકના પીએસઆઈ એચ.એમ. ચાવડા સહિતનો પોલીસ કાફલો ઘટનાસ્થળે દોડી ગયો હતો.
તપાસ દરમિયાન જાણવા મળ્યું છે કે મૃતક માનસીબેનના લગ્ન ચાર વર્ષ પહેલાં રેલનગર વિસ્તારના નિવાસી મિલન આંબલીયા સાથે થયા હતા. લગ્નજીવન દરમિયાન છેલ્લા કેટલાક સમયથી પતિ-પત્ની વચ્ચે સમય આપવા બાબતે અવારનવાર મનદુઃખ અને વિવાદ ચાલી રહ્યો હતો. પરિણીતાની સતત એવી ફરિયાદ હતી કે તેનો પતિ તેને પૂરતો સમય આપતો નથી. ઘટનાના દિવસે પણ આ જ મુદ્દે દંપતી વચ્ચે ઉગ્ર બોલાચાલી થઈ હતી, જેનાથી અત્યંત નારાજ થઈને માનસીબેન સાસરી છોડીને પોતાના પિયર ચાલી ગઈ હતી.
પિયર આવ્યા બાદ પણ પરિણીતા ભારે માનસિક તણાવ અને અસ્વસ્થતા અનુભવી રહી હતી. સૌથી વધુ આઘાતજનક વાત એ છે કે બીજા જ દિવસે તેનો ૨૪મો જન્મદિવસ હતો. એક તરફ પરિવારમાં તેના જન્મદિવસની ઉજવણી અંગે વિચારાઈ રહ્યું હતું, ત્યારે બીજી તરફ માનસિક રીતે ભાંગી પડેલી પરિણીતાએ અપાર્ટમેન્ટના નવમા માળેથી નીચે ઝંપલાવી દીધું હતું. ઊંચાઈ પરથી નીચે પતકાવાને કારણે તેને ગંભીર ઈજાઓ પહોંચી હતી અને તેનું મૃત્યુ થતાં આશાસ્પદ યુવતીની જિંદગીનો કરૂણ અંત આવ્યો હતો.
આ બનાવ અંગે યુનિવર્સિટી પોલીસે હાલ અકસ્માતે મોતનો ગુનો નોંધીને કાયદેસરની કાર્યવાહી હાથ ધરી છે. મૃતદેહને પોસ્ટમોર્ટમ માટે ખસેડીને પોલીસે પિયર તથા સાસરી પક્ષના સભ્યોના વિગતવાર નિવેદનો નોંધવાની તજવીજ શરૂ કરી છે. દંપતી વચ્ચેના સમય ન આપવાના વિવાદ સિવાય આ ગૃહકલેશ પાછળ કોઈ અન્ય કોઈ આંતરિક કારણો કે શારીરિક-માનસિક ત્રાસ જવાબદાર છે કે કેમ, તે તમામ પાસાંઓ પર પોલીસે ઊંડાણપૂર્વક તપાસના ચક્રો ગતિમાન કર્યા છે.
