નવી દિલ્હી, 27 જુલાઈ : બાંગ્લાદેશ સામેની આગામી ટેસ્ટ શ્રેણીમાં જસપ્રીત બુમરાહના સ્થાને શુભમન ગિલ ભારતીય ક્રિકેટ ટીમનો વાઇસ કેપ્ટન બની શકે છે. તે શ્રીલંકા પ્રવાસ પર ODI અને T20 ટીમનો વાઇસ કેપ્ટન છે. રેવસ્પોર્ટ્ઝના મતે ગિલને ટેસ્ટ ક્રિકેટમાં પણ મહત્વની જવાબદારી સોંપવામાં આવશે. ગિલ હાલમાં તમામ ફોર્મેટમાં કેપ્ટનશિપ માટેના મોટા દાવેદારોમાંનો એક માનવામાં આવે છે. બાંગ્લાદેશ સામેની શ્રેણીની વાત કરીએ તો, પ્રથમ ટેસ્ટ 19 સપ્ટેમ્બરે ચેન્નાઈમાં રમાશે, જ્યારે બીજી મેચ 27 સપ્ટેમ્બરે નાગપુરના ગ્રીન પાર્કમાં રમાશે.
ટીમ ઈન્ડિયા શ્રીલંકા પ્રવાસ માટે રવાના થાય તે પહેલા મુખ્ય પસંદગીકાર અજીત અગરકર અને મુખ્ય કોચ ગૌતમ ગંભીરે મીડિયા સાથે વાત કરી હતી. ત્યાં અગરકરે કહ્યું હતું કે શા માટે ગિલને વાઇસ કેપ્ટન બનાવવામાં આવ્યો હતો. તેણે કહ્યું હતું કે, ‘અમને લાગે છે કે શુભમન મજબૂત ઉમેદવાર છે. તે તમામ ફોર્મેટમાં રમે છે અને ગયા વર્ષે ડ્રેસિંગ રૂમમાંથી તેને મળેલા પ્રતિસાદના આધારે તેણે સારા ગુણો દર્શાવ્યા છે. અમે ઈચ્છીએ છીએ કે તે સૂર્યા કે રોહિત જેવા ખેલાડીઓ પાસેથી શીખે. આ રીતે, જો ઇજાઓ થાય અથવા ફોર્મ ખરાબ થાય, તો અમારે કેપ્ટનશિપ માટે સંઘર્ષ ન કરવો પડે. અમે તેમને વધુ વિકાસ માટે અનુભવ આપવા માંગીએ છીએ. કોઈ ગેરેંટી નથી, પરંતુ આ વર્તમાન યોજના છે.
જસપ્રીત બુમરાહની સૌથી મોટી સમસ્યા ફિટનેસની છે. જો કે તે છેલ્લા કેટલાક સમયથી સંપૂર્ણ રીતે ફિટ દેખાઈ રહ્યો છે, તેમ છતાં તેના માટે તમામ મેચ રમવી મુશ્કેલ છે. તેમના વર્કલોડને મેનેજ કરવું પડશે. આ કારણે ભારતને એક એવા વાઇસ કેપ્ટનની જરૂર છે જે તમામ મેચ રમી શકે. ગિલ ગયા વર્ષ સુધી ટેસ્ટમાં રન માટે સંઘર્ષ કરી રહ્યો હતો. પરંતુ આ વર્ષે ઈંગ્લેન્ડ સામેની 5 મેચની શ્રેણીમાં તેણે ત્રીજા નંબર પર રમતા 452 રન બનાવ્યા હતા. રાંચી ટેસ્ટની છેલ્લી ઈનિંગમાં તેણે મુશ્કેલ પરિસ્થિતિમાં અંત સુધી અણનમ રહીને ટીમને જીત અપાવી હતી.
