અમદાવાદ: શહેરમાં ગેરકાયદેસર દબાણો સામે તંત્ર દ્વારા મેગા ડ્રાઇવ હાથ ધરવામાં આવી હતી. આ અંતર્ગત અમદાવાદના આસારામ આશ્રમ નજીક વર્ષોથી ઉભા રહેલા દબાણો પર તંત્રનો બુલડોઝર ફરી વળ્યો હતો. વહેલી સવારથી જ તંત્રની ટીમો સ્થળ પર પહોંચી ગઈ હતી અને ભારે પોલીસ બંદોબસ્ત વચ્ચે દબાણ હટાવવાની કામગીરી શરૂ કરવામાં આવી હતી.
પ્રાપ્ત માહિતી અનુસાર, જાહેર માર્ગ અને સરકારી જમીન પર ઉભા કરાયેલા ગેરકાયદેસર બાંધકામોને દૂર કરવા માટે મહાનગરપાલિકા અને પોલીસ તંત્ર દ્વારા સંયુક્ત કાર્યવાહી હાથ ધરવામાં આવી હતી. કામગીરી દરમિયાન કોઈ અનિચ્છનીય ઘટના ન બને તે માટે મોટી સંખ્યામાં પોલીસ જવાનો તૈનાત કરવામાં આવ્યા હતા.
તંત્ર દ્વારા જેસીબી અને અન્ય મશીનરીની મદદથી દબાણો દૂર કરવામાં આવ્યા હતા. કાર્યવાહી દરમિયાન કેટલાક સ્થાનિકોએ રજૂઆતો પણ કરી હતી, પરંતુ તંત્ર દ્વારા અગાઉ આપવામાં આવેલી નોટિસ અને નિયમો મુજબ કાર્યવાહી આગળ ધપાવવામાં આવી હતી.
શહેરમાં ટ્રાફિક અને જાહેર સુવિધાઓને અસર કરતા દબાણો દૂર કરવા માટે તંત્ર છેલ્લા કેટલાક સમયથી સતત અભિયાન ચલાવી રહ્યું છે. આ કાર્યવાહીના ભાગરૂપે આસારામ આશ્રમ નજીકનો વિસ્તાર પણ આવરી લેવામાં આવ્યો હતો. તંત્રના અધિકારીઓએ જણાવ્યું હતું કે જાહેર હિત અને શહેરના સુવ્યવસ્થિત વિકાસ માટે ગેરકાયદેસર દબાણો સામે આવી કાર્યવાહી આગામી દિવસોમાં પણ ચાલુ રહેશે.
આ મેગા એક્શનને લઈને વિસ્તારમાં ભારે ચર્ચા જામી હતી અને કામગીરી જોવા માટે મોટી સંખ્યામાં લોકો પણ એકત્ર થયા હતા. તંત્રની આ કાર્યવાહીને કારણે વિસ્તારની સરકારી જમીન અને માર્ગો દબાણમુક્ત બન્યા હોવાનું અધિકારીઓએ જણાવ્યું હતું.
