ગુજરાતમાં આગામી દિવસોમાં હવામાનમાં નોંધપાત્ર ફેરફાર જોવા મળી શકે છે. હવામાન વિભાગ (IMD) દ્વારા રાજ્યના અનેક વિસ્તારોમાં વરસાદ, ગાજવીજ અને તેજ પવનની આગાહી કરવામાં આવી છે. ખાસ કરીને સૌરાષ્ટ્ર, ઉત્તર ગુજરાત અને દક્ષિણ ગુજરાતના જિલ્લાઓમાં છૂટાછવાયા સ્થળોએ હળવાથી મધ્યમ વરસાદ સાથે વીજળીના કડાકા-ભડાકા થવાની સંભાવના વ્યક્ત કરવામાં આવી છે.
હવામાન વિભાગના જણાવ્યા અનુસાર રાજકોટ, મોરબી, સુરેન્દ્રનગર, જૂનાગઢ, અમરેલી, ભાવનગર, ગીર સોમનાથ અને કચ્છ સહિતના વિસ્તારોમાં 40 થી 50 કિલોમીટર પ્રતિ કલાકની ઝડપે પવન ફૂંકાઈ શકે છે. ઉત્તર ગુજરાતના કેટલાક જિલ્લાઓમાં પણ ગાજવીજ સાથે વરસાદની શક્યતા છે, જેના કારણે લોકોને સાવચેતી રાખવાની સૂચના આપવામાં આવી છે.
દક્ષિણ ગુજરાતના સુરત, નવસારી, વલસાડ, ડાંગ, તાપી, ભરૂચ અને નર્મદા જિલ્લામાં પણ વરસાદી માહોલ જામવાની શક્યતા છે. હવામાન વિભાગે ખેડૂતોને ખુલ્લામાં પડેલો પાક સુરક્ષિત રાખવા અને વીજળીના કડાકા સમયે ખુલ્લા મેદાનમાં ન રહેવા અપીલ કરી છે.
આ દરમિયાન દેશભરમાં ચોમાસાની ગતિ પણ તેજ બની રહી છે. દક્ષિણ ભારતમાં કેરળમાં ચોમાસાનું સત્તાવાર આગમન થઈ ચૂક્યું છે અને આગામી દિવસોમાં તેની અસર પશ્ચિમ ભારત તરફ વધવાની શક્યતા છે. જેના કારણે ગુજરાતમાં પણ વરસાદી પ્રવૃત્તિમાં વધારો થવાની સંભાવના વ્યક્ત કરવામાં આવી રહી છે.
હવામાન વિભાગે લોકોને ગાજવીજ દરમિયાન વૃક્ષ નીચે આશરો ન લેવા, બિનજરૂરી મુસાફરી ટાળવા અને સ્થાનિક તંત્ર દ્વારા આપવામાં આવતી સૂચનાઓનું પાલન કરવાની સલાહ આપી છે. આગામી 48 કલાક ગુજરાતના અનેક વિસ્તારો માટે મહત્વપૂર્ણ માનવામાં આવી રહ્યા છે.
 દ્વારા રાજ્યના અનેક વિસ્તારોમાં){kind=link}