પેરિસ, 26 જુલાઈ : પેરિસ ઓલિમ્પિકના ઉદઘાટન સમારોહના થોડા કલાકો પહેલાં, ફ્રાન્સનું હાઇ-સ્પીડ રેલ નેટવર્ક ખોરવાઈ ગયું હતું. અહેવાલો અનુસાર રેલવે લાઇન પર આગચંપી કરવામાં આવી હતી. આ દૂષિત કૃત્યથી રેલવ્યવહાર વ્યવસ્થાને માઠી અસર થઈ છે. ઉલ્લેખનીય છે કે ફ્રાન્સની રાજધાની પેરિસમાં આજથી (26 જુલાઈ)થી ઓલિમ્પિક શરૂ થઈ રહ્યો છે.
ફ્રેન્ચ ટ્રેન ઓપરેટર કંપની SNCFએ આજે શુક્રવારે (26 જુલાઈ) પેરિસ ઓલિમ્પિકના ઉદ્ઘાટન સમારોહ પહેલા આ સમગ્ર મામલાની જાણકારી ન્યૂઝ એજન્સીને આપી હતી. ટ્રેન ઓપરેટર SNCFએ જણાવ્યું હતું કે ફ્રાન્સના હાઇ-સ્પીડ રેલ નેટવર્ક પર આગચંપી કરવામાં આવી હતી. જેના કારણે સમગ્ર રેલવ્યવહાર વ્યવસ્થા બિનઅસરકારક બની હતી.કેસની તપાસ કરી રહેલા એક સૂત્રએ એએફપીને જણાવ્યું હતું કે આ દરમિયાન તોડફોડ કરવાનો પ્રયાસ પણ કરવામાં આવ્યો હતો. જેના કારણે અનેક રૂટ કેન્સલ કરવા પડ્યા હતા. રેલ ઓપરેટરે જણાવ્યું હતું. આ હુમલાઓથી ટ્રેન લાઇનની એટલાન્ટિક, ઉત્તરીય અને પૂર્વીય રેખાઓ પ્રભાવિત થઈ હતી.
SNCF એ મુસાફરોને તેમની મુસાફરી મુલતવી રાખવા અને ટ્રેન સ્ટેશનોથી દૂર રહેવા વિનંતી કરી છે. આ હુમલાઓ પેરિસમાં ઓલિમ્પિક સમારોહની તૈયારીઓ દરમિયાન કરવામાં આવ્યા છે. જેમાં 7,500 એથ્લેટ, 300,000 દર્શકો અને VIP સામેલ થવાના છે.
ફ્રેન્ચ ન્યૂઝ આઉટલેટ BFMTV સાથે વાત કરતા, SNCF ગ્રુપના પ્રમુખે કહ્યું કે 8 લાખ ટ્રેન મુસાફરોને અસર થઈ છે. તેમણે વધુમાં જણાવ્યું હતું કે ઓલિમ્પિક ગેમ્સ માટે નેટવર્ક તૈયાર હતું, પરંતુ હવે તેઓ નેટવર્કને શક્ય તેટલી વહેલી તકે રિપેર કરવા માટે સેંકડો કર્મચારીઓને એકત્રિત કરવાનું વિચારી રહ્યા છે.
france24.comના અહેવાલ મુજબ, યુરોસ્ટાર (રેલ્વે કંપની) એ જણાવ્યું હતું કે તોડફોડની ઘટનાઓને કારણે લંડન અને પેરિસ વચ્ચેની સેવાઓ ખોરવાઈ ગઈ છે, જેના પરિણામે ઘણી ટ્રેનો રદ થઈ છે અને મુસાફરીનો સમય વધી ગયો છે. યુરોસ્ટારે એક નિવેદનમાં કહ્યું – ફ્રાન્સમાં બનેલી આ ઘટનાને કારણે પેરિસ અને લિલી વચ્ચેની હાઇ સ્પીડ લાઇનને અસર થઈ છે. પેરિસ જતી તમામ હાઇ સ્પીડ ટ્રેનોને આજે (શુક્રવાર, જુલાઈ 26) ક્લાસિક લાઇન દ્વારા ડાયવર્ટ કરવામાં આવી રહી છે. જેના કારણે મુસાફરીના સમયમાં લગભગ દોઢ કલાકનો વધારો થયો છે.
ફ્રાન્સના પરિવહન પ્રધાન પેટ્રિસ વેગ્રિએટે ટ્વિટર પર એક પોસ્ટમાં જણાવ્યું હતું કે તેઓ “આ ગુનાહિત ઘટનાઓની સખત નિંદા કરે છે, અને SNCF ટ્રાફિક પુનઃસ્થાપિત કરવા માટે કામ કરી રહ્યા છે.”
