કેબિનેટની બેઠક બાદ માહિતી અને પ્રસારણ મંત્રી અશ્વિની વૈષ્ણવે જણાવ્યું હતું કે આ નેશનલ ક્રિટિકલ મિનરલ્સ મિશનનો ઉદ્દેશ્ય ક્રિટિકલ મિનરલ્સની આયાત પરની નિર્ભરતા ઘટાડવાનો અને આત્મનિર્ભરતાને સુનિશ્ચિત કરવાનો છે.
કેન્દ્રીય કેબિનેટે સામાન્ય બજેટ પહેલા ખેડૂતોને મોટી રાહત આપી છે. મોદી કેબિનેટે આજે બુધવારે બે મહત્વપૂર્ણ નિર્ણયોને મંજૂરી આપી છે. આ નિર્ણયથી ખેડૂતોને પણ ફાયદો થશે. આ ઉપરાંત એગ્રી સેક્ટર સહિત અન્ય ઘણા ક્ષેત્રોને પણ ફાયદો થશે. આ ઉપરાંત કેબિનેટે 16300 કરોડ રૂપિયાના નેશનલ ક્રિટિકલ મિનરલ્સ મિશનને પણ મંજૂરી આપી દીધી છે. આ સાથે દેશને ખનિજોના ક્ષેત્રમાં આત્મનિર્ભર બનાવવામાં આવશે.
આ નિર્ણય સાથે, ઇથેનોલ બ્લેન્ડેડ પેટ્રોલ પ્રોગ્રામ દ્વારા સી-હેવી મોલાસીસ (CHM) માટેની એક્સ-મિલ કિંમત 56.58 રૂપિયા પ્રતિ લિટરથી વધારીને 57.97 રૂપિયા પ્રતિ લિટર કરવામાં આવી છે. જેનો ફાયદો ખેડૂતોને થશે. આ ઉપરાંત ક્રૂડ ઓઈલ પર દેશની નિર્ભરતા ઘટશે અને વિદેશી હૂંડિયામણ બચાવવામાં મદદ મળશે.
કેન્દ્રની મોદી સરકારે આ વર્ષે 31 ઓક્ટોબરના રોજ પૂરા થતા 2024-25ના સમયગાળા માટે C હેવી મોલાસીસમાંથી મેળવેલા ઇથેનોલની એક્સ-મિલ કિંમત રૂ. 1.69 વધારીને રૂ. 57.97 પ્રતિ લિટર કરવાની મંજૂરી આપી છે. શેરડીના રસ, ખાંડ અને ખાંડની ચાસણીમાંથી ઉત્પાદિત બી હેવી મોલાસીસ (BHM) અને ઇથેનોલના ભાવ અનુક્રમે રૂ. 60.73 પ્રતિ લિટર અને રૂ. 65.61 પ્રતિ લિટર પર યથાવત રહ્યા હતા.આર્થિક બાબતોની કેબિનેટ સમિતિ દ્વારા લેવામાં આવેલા નિર્ણયની જાહેરાત કરતા માહિતી અને પ્રસારણ મંત્રી અશ્વિની વૈષ્ણવે જણાવ્યું હતું કે ઇથેનોલ સપ્લાય વર્ષ (ઇથેનોલ સપ્લાય વર્ષ 2024-25) માટે જાહેર ક્ષેત્રની ઓઇલ માર્કેટિંગ કંપનીઓ (OMCs) ખરીદી કિંમતમાં સુધારાને મંજૂરી આપવામાં આવી છે. સરકારે વર્ષ 2025-26 થી 2030 સુધી પેટ્રોલમાં 20 ટકા ઇથેનોલ મિશ્રિત કરવાનો લક્ષ્યાંક પણ લંબાવ્યો છે.
