છેલ્લા ત્રણ દિવસમાં શેરબજારમાં ૧૪૦૦ પોઈન્ટથી વધુનો ઘટાડો થયો છે. જો શેર બજારમાં ઘટાડાના મુખ્ય કારણોની વાત કરીએ તો અમેરિકામાં મોંઘવારી અને નોકરીઓના ખરાબ આંકડા તો છે જ, સાથે જ અન્ય કારણો પણ છે. જેમાં રૂપિયામાં ઘટાડો, વિદેશી રોકાણકારોની વેચવાલી અને રોકાણકારોનું પ્રોફિટ બુકિંગ મુખ્ય છે.
શેરબજારમાં સતત ત્રીજા દિવસે ઘટાડો જોવા મળી રહ્યો છે. મંગળવારથી સેન્સેક્સમાં લગભગ 1.70 ટકા એટલે કે 1400 અંકથી વધુનો ઘટાડો જોવા મળ્યો છે. આ ઘટાડા પાછળ ઘણા લોકો અમેરિકા અને ચીનના નબળા આર્થિક આંકડા માની રહ્યા છે. આ ઘટાડા પાછળ આ બંને કારણો જવાબદાર છે. પરંતુ શેરબજારમાં ઘટાડા પાછળ આ બે કારણો જ કારણ નથી. આ ઘટાડા પાછળનું મુખ્ય કારણ શેરબજારનું ઊંચું વેલ્યુએશન છે. જેના કારણે રોકાણકારો વતી વેચવાલી આવી રહી છે. બુધવાર પહેલા શેરબજારમાં સતત 14 દિવસ સુધી તેજી જોવા મળી હતી.
આ પણ વાંચો: બળાત્કાર એ મૃત્યુદંડની સજાને પાત્ર છે… વિધાનસભામાં બિલ લાવશે મમતા બેનર્જી
તો બીજી તરફ રૂપિયામાં ઘટાડા અને ડોલર ઇન્ડેક્સમાં ફરી એકવાર મજબૂતીથી શેરબજારમાં પણ દબાણ ઊભું થઇ રહ્યું છે. ડોલર સામે રૂપિયો રેકોર્ડ 84 રૂપિયા પર જોવા મળી રહ્યો છે. ભારતીય રૂપિયાની ગણતરી એશિયાની સૌથી નબળી કરન્સીમાં કરવામાં આવી રહી છે. આવી સ્થિતિમાં શેરબજારમાં ઘટાડાનું આ પણ એક મહત્વનું કારણ છે.
આ ઉપરાંત સપ્ટેમ્બર મહિનામાં વિદેશી રોકાણકારોની વેચવાલી સ્પષ્ટ જોવા મળે છે. જેની અસર પણ બજાર પર સ્પષ્ટ દેખાઈ રહી છે. સાથે જ આગામી એક સપ્તાહમાં મોંઘવારીના આંકડા આવી રહ્યા છે. ઓગસ્ટ મહિનાનો ડેટા જુલાઈ મહિનામાં જે રીતે જોવા મળ્યો હતો તેવો થવાનો નથી. સૌથી મોટું પરિબળ ખાદ્ય ફુગાવો છે, જે સતત ઊંચા સ્તરે છે. શેરબજારમાં ઘટાડાના તમામ કારણોની પણ ચર્ચા કરીએ.
શેરબજારમાં ઘટાડાના આ છે મુખ્ય કારણો
- શેરબજારમાં પ્રોફિટ-બુકિંગઃ આ સપ્તાહે બુધવારે ભારતીય શેરબજારમાં વેચવાલી શરૂ થઈ તે પહેલાં બજારમાં 14 દિવસ સુધી તેજી જોવા મળી હતી. શેરબજારમાં હાલ ઓવરવેલ્યુએશન થયું છે. જેના કારણે બજારમાં રોકાણકારો તરફથી પ્રોફિટ બુકિંગ જોવા મળી રહ્યું છે. એસએમસી ગ્લોબલ સિક્યોરિટીઝના સિનિયર ઇક્વિટી રિસર્ચ એનાલિસ્ટ સીમા શ્રીવાસ્તવે જણાવ્યું હતું કે, “ભારતીય શેરબજારમાં ઓવર-બાયિંગ હતું. માટે હાલની વેચવાલીને માત્ર પ્રોફિટ-બુકિંગ તરીકે જ લેવી જોઇએ.
- તો બીજી તરફ 1 ડૉલરના મુકાબલે ભારતીય રૂપિયો નોંધપાત્ર ઘટાડાની સાથે કારોબાર કરી રહ્યો છે. હાલ ડોલર સામે રૂપિયો 84ના સ્તરની આસપાસ જોવા મળી રહ્યો છે. છેલ્લા 15 દિવસમાં રૂપિયામાં 0.13 ટકાનો ઘટાડો જોવા મળ્યો છે. જો ચાલુ વર્ષની વાત કરીએ તો રૂપિયામાં 1 ટકાનો ઘટાડો જોવા મળ્યો છે.
- ડૉલર ઈન્ડેક્સમાં સુધારોઃ બીજી બાજુ ડૉલર ઈન્ડેક્સમાં સુધારો જોવા મળી રહ્યો છે. આમ જોવા જઈએ તો છેલ્લા એક મહિનામાં 2.12 ટકાનો ઘટાડો નોંધાયો છે. તે જ સમયે, ડોલર ઇન્ડેક્સમાં એક વર્ષમાં લગભગ 4 ટકાનો ઘટાડો જોવા મળ્યો છે. જાણકારોના મતે ડોલરમાં તેજી આવવાની કોશિશ થઇ રહી છે. આ જ કારણ છે કે શેરબજારમાં ઘટાડાનો સમયગાળો છે. આંકડા મુજબ ડૉલર ઈન્ડેક્સ હાલ 101ના સ્તર પર કારોબાર કરી રહ્યો છે.
- બીજી તરફ છેલ્લા એક સપ્તાહ કે ચાલુ માસમાં વિદેશી રોકાણકારોની ઉદાસીનતા સ્પષ્ટ દેખાઈ રહી છે. આંકડા મુજબ વિદેશી રોકાણકારોએ ગુરુવારે ભારતીય શેરબજારમાંથી પોતાના નાણાં પાછા ખેંચી લીધા હતા. વિદેશી રોકાણકારોએ એક દિવસ પહેલા 688.69 કરોડ રૂપિયાના શેર વેચ્યા હતા, જ્યારે વિદેશી રોકાણકારોએ ચાલુ મહિનામાં 11,882 કરોડ રૂપિયાનું રોકાણ શેરબજારમાં કર્યું છે.
- પ્રોફિટમાર્ટ સિક્યોરિટીઝના રિસર્ચ હેડ અવિનાશ ગોરક્ષકરે જણાવ્યું હતું કે બજારમાં ઘટાડાનું મુખ્ય કારણ આ મહિને યોજાનારી યુએસ ફેડની બેઠકમાં વ્યાજદરમાં ઘટાડાની જાહેરાત અંગેની અનિશ્ચિતતા છે. જો યુએસ ફેડ 25 બીપીએસ રેટ કટની જાહેરાત કરે છે, તો બજાર આ નિર્ણયથી ખુશ નહીં થાય. સાથે જ 50 બેસિસ પોઇન્ટનો ઘટાડો શેરબજારમાં નવા પ્રાણ ફૂંકી શકે છે.
- પ્રોફિટમાર્ટ સિક્યોરિટીઝના અવિનાશ ગોરક્ષકરે જણાવ્યું હતું કે જુલાઈમાં યુએસની નોકરીઓ ઘટીને સાડા ત્રણ વર્ષની નીચી સપાટીએ પહોંચી ગઈ હતી, જેના કારણે યુએસ લેબર માર્કેટમાં મંદી આવી હતી. ભારત સહિત વિશ્વના તમામ શેરબજારોમાં ઘટાડાનો સમયગાળો જોવા મળી રહ્યો છે.
- અમેરિકામાં ફુગાવાનો ભયઃ અમેરિકાના શ્રમબજારમાં મંદીની આશંકાએ અમેરિકાના ફુગાવાની ચિંતા ફરી વધવાની ભીતિ વ્યક્ત કરી છે, જેના કારણે યુએસ ફેડને દરોમાં ઘટાડાના નિર્ણય અંગે ફેરવિચારણા કરવાની ફરજ પડી શકે છે. જો તેઓ તેમના નરમ વલણ સાથે આગળ વધે તો પણ, બજારને ડર છે કે યુએસ ફેડ રેટ કટ 25 બીપીએસથી વધુ ન થઈ શકે.
શેરબજારમાં ભારે ઘટાડો
શુક્રવારે શેરબજારમાં સવારથી જ ભારે ઘટાડો જોવા મળી રહ્યો છે. ટ્રેડિંગ સેશન દરમિયાન સેન્સેક્સમાં 1055.88 પોઇન્ટનો ઘટાડો નોંધાયો છે. બીએસઈના આંકડા મુજબ આ શેર મામૂલી ઘટાડા સાથે 82,171.08 પોઈન્ટ પર ખુલ્યો અને 81,145.28 અંકોની સાથે દિવસના નીચલા સ્તર પર પહોંચી ગયો. છેલ્લા ત્રણ દિવસમાં સેન્સેક્સમાં 1400 પોઇન્ટથી વધુનો ઘટાડો જોવા મળ્યો છે. તો બીજી તરફ નિફ્ટીમાં પણ ઘટાડો જોવા મળી રહ્યો છે. ટ્રેડિંગ સેશન દરમિયાન નિફ્ટીમાં 300 અંકોથી વધુનો ઘટાડો જોવાને મળ્યો છે. હાલ નિફ્ટી 288 પોઇન્ટના ઘટાડા સાથે 24,858 પોઇન્ટ પર કારોબાર કરી રહ્યો છે.
