નેપાળમાં સોશિયલ મીડિયા પ્રતિબંધ અને ભ્રષ્ટાચાર વિરુદ્ધ ચાલી રહેલા આંદોલનનો આજે ત્રીજો દિવસ છે. હિંસક વિરોધ પ્રદર્શનોને રોકવા માટે, સેનાએ મંગળવાર રાતથી સમગ્ર દેશનો કબજો સંભાળી લીધો છે. આ દરમિયાન, સમાચાર આવી રહ્યા છે કે નેપાળના ભૂતપૂર્વ વડા પ્રધાન કેપી શર્મા ઓલી દેશ છોડીને દુબઈ ભાગી ગયા છે.
મીડિયા રિપોર્ટ્સમાં તો એવું પણ કહેવામાં આવી રહ્યું છે કે ઓલીએ દેશ છોડવા માટે સેનાની મદદ માંગી હતી. એવું કહેવામાં આવી રહ્યું છે કે તેઓ તબીબી સારવારના બહાને દુબઈ ગયા છે. અને હિમાલયા એરલાઇન્સનું એક જેટ પણ તેમના માટે સ્ટેન્ડબાય પર રાખવામાં આવ્યું હતું. દરમિયાન, લલિતપુરના ભૈસેપતિ વિસ્તારમાં એક હેલિકોપ્ટર ઉડતું જોવા મળ્યા બાદ આ અટકળોને વધુ વેગ મળ્યો છે.
હિંસાનો ફેલાવો
આંદોલનના બીજા દિવસે, વિરોધીઓનો ગુસ્સો એટલો વધી ગયો હતો કે તેમણે ઓલીના અંગત ઘર તેમજ રાષ્ટ્રપતિ ભવન અને સુપ્રીમ કોર્ટને આગ ચાંપી દીધી હતી. તાજેતરના અહેવાલો અનુસાર, અથડામણ અને આગચંપીમાં અત્યાર સુધીમાં 22 લોકો માર્યા ગયા છે અને 400 થી વધુ લોકો ઘાયલ થયા છે.
સેનાએ ચેતવણી આપી
નેપાળી સેનાએ સ્પષ્ટપણે જણાવ્યું છે કે કેટલાક બદમાશો સામાન્ય નાગરિકો અને સરકારી સંપત્તિને નિશાન બનાવી રહ્યા છે. રાજધાની કાઠમંડુ સહિત ઘણા વિસ્તારોમાં લૂંટફાટ, આગચંપી અને તોડફોડ જેવી ઘટનાઓ બની રહી છે. સેનાએ લોકોને આ પ્રવૃત્તિઓથી દૂર રહેવા અપીલ કરી છે, અન્યથા કડક કાર્યવાહી કરવામાં આવશે.
પૂર્વ વડાપ્રધાનોના ઘરો પર હુમલા
માત્ર ઓલી જ નહીં, આંદોલનકારીઓએ ત્રણ અન્ય ભૂતપૂર્વ વડા પ્રધાનોને પણ નિશાન બનાવ્યા હતા. શેર બહાદુર દેઉબા, ઝાલનાથ ખાનાલ અને પુષ્પ કમલ દહલ પ્રચંડના ઘરોને આગ લગાવી દેવામાં આવી હતી. ભૂતપૂર્વ પીએમ ખાનાલના પત્ની રાજલક્ષ્મી ચિત્રકર આગમાં ગંભીર રીતે દાઝી ગયા હતા અને બાદમાં હોસ્પિટલમાં તેમનું મૃત્યુ થયું હતું. તે જ સમયે, વિરોધીઓ શેર બહાદુર દેઉબાના ઘરમાં ઘૂસી ગયા અને તેમને માર માર્યો અને નાણામંત્રી વિષ્ણુ પૌડેલનો જાહેરમાં પીછો કરીને માર મારવામાં આવ્યો.
