દાહોદના હિમાલામાં 4 માસની બિમાર બાળકીને ભુવાએ લોખંડના સળિયાથી ડામ આપ્યા

(આઝાદ સંદેશ),રાજકોટ: દાહોદ જિલ્લાના ગરબાડા તાલુકાના હિમાલા ગામે એક ચાર માસની માસુમ બાળાને ભુવાએ સારવાર કરવાના બહાને ડામ આપતા બાળકીની હાલત ગંભીર બની છે. બાળકીની તબિયત લથડતા પરિવારજનો તેને લઇને દાહોદ દોડી આવ્યા છે અને હાલમાં ખાનગી હોસ્પિટલમાં સારવાર ચાલી રહી છે. બીજી તરફ આ કેસની જાણ થતા પોલીસ પણ હરકતમાં આવી છે અને ભુવાને ઝડપી પાડવા માટે કાર્યવાહી શરૂ કરી છે. મળતી માહિતી મુજબ આદિવાસીની બહુમતી ધરાવતા દાહોદ જિલ્લામાં અંધશ્રદ્ધાનું ભુત હજુ પણ ધુણી રહ્યું છે. સમયાંતરે અંધશ્રદ્ધાના વિવિધ બનાવો બહાર આવતા રહે છે. જેમાં મોટાભાગે બાળકો અને મહિલાઆ જ ભોગ બનતા હોય છે. આવો જ એ કિસ્સો ફરીથી બહાર આવ્યો છે. જેમાં માત્ર 4 મહીનાની માસુમ બાળકી ભોગ બની છે. ગરબાડા તાલુકાના હિમાલા ગામે એક પરિવારની ચાર માસની માસુમ બાળકીને તાવ, શરદી, ખાંસી તેમજ ન્યુમોનિયા જેવી બીમારી થતા પરિવારજનો બાળકીની સારવાર માટે હોસ્પિટલમાં જવાને બદલે ગામના એક ભુવા, બડવા પાસે લઇ ગયા હતા. ભુવાએ 4 મહીનાની બાળકીને વળગાડ હોવાનું કહીને લોખંડના સળીયા ગરમ કર્યા હતા અને પરિવારજનોની સામે જ માસુમ બાળકીના છાતીના ભાગે ગરમ ગરમ ડામ દેતા બાળકી ચીસો પાડવા લાગી હતી તેમ છતા ભુવા કે પરિવારજનોનું હૃદય પીગળ્યું નહતું અને વધુ ડામ આપ્યા હતા. છાતી અને પેટની આસપાસ ચારથી વધુ ડામ આપવાના કારણે બાળકીની તબિયત લથડતા પરિવારજનો હેબતાઇ ગયા હતા અને બાળકીને દાહોદની એક ખાનગી હોસ્પિટલમાં સારવાર માટે લાવ્યા છે. હાલ માસુમ બાળકીની તબિયત સારી હોવાનું જાણવા મળી રહ્યું છે. ડોક્ટરોએ ખાસ વિનંતી કરી છે કે કોઇપણ પરિવારમાં અને ખાસ કરીને ગ્રામીણ વિસ્તારો કોઇ બીમાર બાળક અથવા વયસ્ક વ્યક્તિને અંધશ્રદ્ધાના વહેમમાં બડવા, ભુવા પાસે લઇ જવાથી જીવ જોખમમાં મુકાશે તેના બદલે નજીકના સરકારી દવાખાનાનો અથવા હોસ્પિટલનો સંપર્ક કરે તે જરૂરી છે.