રાજકોટના રંગોલી પાર્કમાં ગટર સમસ્યાથી રહિશો પરેશાન, રોગચાળાની ભીતિ વચ્ચે કાયમી ઉકેલની માંગ
રાજકોટ શહેરના ત્રંબા વિસ્તારમાં આવેલા રંગોલી પાર્ક ખાતે ગટર સમસ્યા લાંબા સમયથી રહિશો માટે માથાનો દુખાવો બની રહી છે. સોસાયટીના Q વિગ પાસે આવેલી ગટર અવારનવાર ઊભરાતી હોવાના કારણે સમગ્ર વિસ્તારમાં ગંદુ પાણી ફેલાઈ જાય છે, જેના કારણે રહિશોમાં ભારે રોષ જોવા મળી રહ્યો છે.
સ્થાનિકોના જણાવ્યા અનુસાર, ગટર ઊભરાવાની સમસ્યાના કારણે આશરે 1164 ફ્લેટમાં રહેતા 5000થી વધુ લોકો સીધી અસર અનુભવી રહ્યા છે. ગંદકી અને દુર્ગંધના કારણે આસપાસનું વાતાવરણ અસ્વચ્છ બની રહ્યું છે, જ્યારે મચ્છરો અને જીવાતોનો ઉપદ્રવ પણ વધી રહ્યો છે. રહિશોનું કહેવું છે કે જો સમયસર યોગ્ય કાર્યવાહી નહીં કરવામાં આવે તો રોગચાળો ફાટી નીકળવાની પણ શક્યતા છે.
આ મુદ્દે અનેક વખત રજૂઆતો કરવામાં આવી હોવા છતાં સમસ્યાનો કાયમી ઉકેલ આવ્યો નથી. ગુજરાત હાઉસિંગ બોર્ડ દ્વારા સમયાંતરે સફાઈ અને મરામતની કામગીરી હાથ ધરવામાં આવે છે, પરંતુ તે માત્ર તાત્કાલિક રાહત પૂરતી જ સાબિત થઈ રહી છે. થોડા દિવસોમાં ફરીથી ગટર ઊભરાવાની સ્થિતિ સર્જાતી હોવાના આક્ષેપો રહિશોએ કર્યા છે.
રહિશોનું કહેવું છે કે સ્વચ્છ અને આરોગ્યપ્રદ વાતાવરણમાં રહેવું દરેક નાગરિકનો બંધારણીય અધિકાર છે, પરંતુ સતત સર્જાતી આ સમસ્યાના કારણે તેમના આરોગ્ય અને જીવનની ગુણવત્તા પર અસર પડી રહી છે. સ્થાનિકોએ તંત્ર અને સંબંધિત વિભાગોને તાત્કાલિક સ્થળ પર નિરીક્ષણ કરી કાયમી ઉકેલ લાવવા માટે માંગ કરી છે.
હાલમાં સમગ્ર મામલે તંત્ર તરફથી કોઈ સત્તાવાર નિવેદન સામે આવ્યું નથી, પરંતુ રહિશો હવે આ સમસ્યાનો ઝડપી અને સ્થાયી ઉકેલ આવે તેવી આશા રાખી રહ્યા છે.
