જમ્મુ-કાશ્મીરના કુલગામમાં સેનાનું સર્ચ ઓપરેશન ચાલી રહ્યું છે. કુલગામ જિલ્લાના ગુદ્દર જંગલ વિસ્તારમાં સોમવારે આતંકવાદીઓ અને સુરક્ષા દળો વચ્ચે એન્કાઉન્ટર થયું હતું. આ એન્કાઉન્ટરમાં એક આતંકવાદી ઠાર મરાયો છે. સૂત્રોના જણાવ્યા અનુસાર, સેનાના એક જેસીઓ ઘાયલ થયા છે. જોકે, સર્ચ ઓપરેશન હજુ પણ ચાલુ છે.
સુરક્ષા દળો અને આતંકવાદીઓ વચ્ચે અથડામણ
આ સર્ચ ઓપરેશન અંગે અધિકારીએ જણાવ્યું કે, જ્યારે સંયુક્ત ટીમ શંકાસ્પદ સ્થળની નજીક પહોંચી ત્યારે છુપાયેલા આતંકવાદીઓએ ગોળીબાર શરૂ કરી દીધો, જેનો સુરક્ષા દળોએ પણ જવાબ આપ્યો. આ પછી સુરક્ષા દળો અને આતંકવાદીઓ વચ્ચે એન્કાઉન્ટર શરૂ થયું. આ ઓપરેશનમાં એક આતંકવાદી માર્યો ગયો છે. જોકે, ઓપરેશન હજુ પણ ચાલુ છે.
પાકિસ્તાની ઘુસણખોરની ધરપકડ
એક તરફ કુલગામમાં સર્ચ ઓપરેશન ચલાવવામાં આવી રહ્યું છે, તો બીજી તરફ, અધિકારીઓએ સોમવારે જણાવ્યું હતું કે આર.એસ. પુરા સેક્ટરમાં આંતરરાષ્ટ્રીય સરહદ (IB) પર એક પાકિસ્તાની ઘુસણખોરની ધરપકડ કરવામાં આવી છે. અધિકારીઓએ જણાવ્યું હતું કે પાકિસ્તાનના પંજાબ પ્રાંતના સરગોધાના રહેવાસી સિરાજ ખાન નામના ઘુસણખોરને રવિવારે રાત્રે 9.20 વાગ્યે ઓક્ટ્રોય પોસ્ટ પર તૈનાત બોર્ડર સિક્યુરિટી ફોર્સ (BSF) ના કર્મચારીઓએ જોયો હતો.
ઘુસણખોરને પડકાર્યા બાદ, જવાનોએ થોડા રાઉન્ડ ફાયરિંગ કર્યું, જેના પગલે તેને સરહદી વાડ નજીક ધરપકડ કરવામાં આવી. તેમણે કહ્યું કે તેની પાસેથી કેટલીક પાકિસ્તાની ચલણી નોટો પણ મળી આવી છે. અધિકારીઓએ જણાવ્યું કે ભારતીય ક્ષેત્રમાં ઘુસણખોરીના પ્રયાસ પાછળનો હેતુ જાણવા માટે તેની પૂછપરછ કરવામાં આવી રહી છે.
