કિચનવેરના ધંધાર્થી ચમનલાલ બોરાણીયા (ઉ.68)એ સાયબર ક્રાઇમ પોલીસ મથકમાં ફરિયાદ નોંધાવી
(આઝાદ સંદેશ), રાજકોટ: નાઇઝીરીયાની ગર્વમેન્ટની એક બોડીના નામે રાજકોટના કારખાનેદારને 31 કરોડના ઓર્ડરની લાલચ આપી રૂા.2.18 કરોડ જુદા જુદા ચાર્જીસના નામે ઓનલાઇન મેળવી છેતરપિંડી કરાયાની સાયબર ક્રાઇમ પોલીસ મથકમાં ફરિયાદ નોંધાઇ છે. કારખાનેદારે આટલી માતબર રકમ સામેવાળા ગઠીયાઓ સાથે એક પણ વખત મુલાકાત થઇ ન હોવા છતાં ઓનલાઇન ટ્રાન્સફર કરી દીધાની બાબતથી પોલીસને પણ આશ્ર્ચર્ય થઇ રહ્યું છે.
મળતી માહિતી મુજબ 150 ફુટ રીંગ રોડ પરના બીગબજારની પાછળ બ્રહ્મકુંજ સોસાયટી શેરી નં.2માં રહેતા ચમનલાલ હરખાભાઇ બોરાણીયા (ઉ.68) મવડીના ઉમાકાન્ત પંડીત ઉધોનગરમાં સામુ ઇન્ડસ્ટ્રીઝના નામે કિચન વેર મેન્યુફેક્ચરીંગનું કારખાનું ધરાવે છે. તેણે પોલીસને જણાવ્યું કે, ગત તા.5-6-2023ના રોજ તેના વોટસએપ નંબર ઉપર પ્લસ નંબરના મોબાઇલમાંથી મેસેજ આવ્યો હતો. તેમાં જણાવ્યું હતું કે તેની કંપની જે વસ્તુનું મેન્યુફેક્ચરીંગ કરે છે તેની ખરીદી કરવાની છે. આ માટે ઓર્ડર આપવાનો છે. સામાવાળાએ પોતાનું નામ વિલીયમ ફેંકલીગ જણાવ્યું હતું એટલું જ નહીં તેની કંપનીના મેઇલ આઇડી પર અલગ અલગ મેઇલ આઇડી પરથી ઇન્ક્વાયરી અને ઓર્ડર માટે મેઇલ કર્યા હતા સાથો સાથ 31 કરોડનો માલ ખરીદવા માટે ઓર્ડર આપ્યો હતો. પોતાની ઓળખ નાઇઝર ડેલ્ટા ડેવલપમેન્ટ કમિશન કે જે નાઇઝરીયાની ગર્વમેન્ટની બોેડી છે તેના પ્રતિનિધિ તરીકે આપી હતી. તેણે એમ પણ કહ્યું કે આ ઓર્ડર આઇઝરીયાની ગર્વમેન્ટ દ્વારા આપવામાં આવ્યો છે. ત્યાર પછી તેની પાસેથી બીલ મંગાવી એડવાન્સ પેમેન્ટની વાત કરી 15 હજાર ડોલર સિક્યુરીટી ટેક્સ પેટે માંગ્યા હતા. ફરિયાદમાં ચમનલાલે આગળ જણાવ્યું છે કે, તેણે વિલીયમે જણાવેલ બેન્ક ખાતામાં રકમ જમા કરાવી હતી. આ પછી વકીલની ક્ધસલ્ટીંગ ફી, સ્ટેમ્પ ડ્યુટી વગેરે જેવા જુદા જુદા ચાર્જીસના બહાને અલગ અલગ બેંક ખાતામાં એકંદરે રૂા.2.18 કરોડ ઓનલાઇન જમા કરાવડાવ્યા હતા. આ તમામ રકમ તેણે તેની કંપનીના ખાતામાંથી વિલીયમે જણાવેલા જુદા જુદા બેન્ક ખાતાઓમાં કટકે કટકે જમા કરાવી હતી પરંતુ તેને ઓર્ડરની કોઇ રકમ નહીં મળતા એટલું જ નહીં પોતે જુદા જુદા ચાર્જીસના નામે ઓનલાઇન ટ્રાન્સફર કરેલી રકમ પણ પરત નહીં મળતા ફ્રોડ થયાનું સ્પષ્ટ થયું હતું. જેથી ગઇ તા.7-8-2023ના રોજ ઓનલાઇન ફરિયાદ નોંધાવી હતી. જેના આધારે અંદાજે એકાદ વર્ષ કરતા વધુ સમય બાદ સાયબર ક્રાઇમ પોલીસે આજે ગુનો દાખલ કર્યો હતો. તપાસનીશ પીઆઇ એમ.એ.ઝણકાતે જણાવ્યું કે, આ ફ્રોડ ખરેખર ભારતમાંથી થયું છે કે, વિદેશથી તે હજુ સ્પષ્ટ થયું નથી. ફરિયાદી પાસેથી જે રકમ ઓનલાઇન ટ્રાન્સફર કરાવાઇ છે તે બધી રકમ ભારતની જુદી જુદી બેંકોમાં જ જમા થઇ છે.
