જૂની અદાવતમાં ૬ શખ્સોએ ઘેરીને ધમકી આપી: કડું મારી માથું ફોડી નાખતા યુવક ગોકુલ હોસ્પિટલમાં સારવાર હેઠળ, બી-ડિવિઝન પોલીસમાં ગુનો નોંધાયો
રાજકોટ : રાજકોટના ગ્રીનલેન્ડ ચોકડી વિસ્તારમાં પેસેન્જર ભરવાની મામુલી બાબતે ઉદ્ભવેલી તકરારમાં એક કાર ચાલક પર છ શખ્સોના ટોળાએ અચાનક હુમલો કરી લોહીલુહાણ કરી મૂક્યો હતો. અગાઉ થયેલી બોલાચાલીની અદાવત રાખીને આરોપીઓએ કાર ચડાવવાનો પ્રયાસ કર્યા બાદ યુવકને જાનથી મારી નાખવાની ધમકી આપી હતી. આ બનાવ અંગે બી-ડિવિઝન પોલીસ મથકમાં પાંચ નામજોગ સહિત છ શખ્સો વિરુદ્ધ ગુનો નોંધાયો છે.
રાજકોટના કોઠારીયા મેઈન રોડ પર આવેલા ઘનશ્યામનગરમાં રહેતા અને વ્યવસાયે ડ્રાઈવિંગ કરતા ૩૦ વર્ષીય કૈલાશભાઈ દેવરાજભાઈ ચારણ (ગઢવી) ગ્રીનલેન્ડ ચોકડીથી અમદાવાદ રૂટ પર ભાડેથી અર્ટિગા કાર ચલાવી પોતાનું ગુજરાન ચલાવે છે. આશરે આઠ દિવસ પૂર્વે પેસેન્જર બેસાડવા જેવી સામાન્ય બાબતમાં તેઓને જેસીંગભાઈ રાતડીયા સાથે બોલાચાલી થઈ હતી. જે-તે સમયે આ બાબત શાંત પડી ગઈ હતી, પરંતુ આ જૂની અદાવતનો બદલો લેવાના ઈરાદા સાથે ગત તારીખ ૧૦ ઓક્ટોબરના રોજ મોડી રાત્રે અઢી વાગ્યાના સુમારે જ્યારે કૈલાશભાઈ ચોકડી પર હાજર હતા, ત્યારે જેસીંગભાઈએ પોતાની ગાડી કૈલાશભાઈની કાર આગળ આડી મૂકી દીધી હતી.
જેસીંગભાઈએ કાર આડી નાખ્યાની સાથે જ ત્યાં અચાનક એક કાળા રંગની ક્રેટા કાર ધસી આવી હતી. ક્રેટાના ચાલકે કૈલાશભાઈ પર ગાડી ચડાવી દઈ જાનથી મારી નાખવાનો પ્રયત્ન કર્યો હતો, જેમાં ગાડી કૈલાશભાઈના પગ પર ચડી ગઈ હતી. તુરંત જ તે કારમાંથી વિપુલ રાતડીયા નીચે ઉતર્યો હતો. તેની પાછળ જ અન્ય એક કાળા રંગની કારમાં લાલજીભાઈ રાતડીયા અને યોગેશભાઈ રાતડીયા પણ સ્થળ પર આવી પહોંચ્યા હતા. આ તમામ શખ્સો સાથે રવીભાઈ રાતડીયા અને અન્ય એક અજાણ્યો માણસ ગેરકાયદેસર મંડળી રચીને કૈલાશભાઈ પર તૂટી પડ્યા હતા અને ઉગ્ર ઝઘડો કરી ઝપાઝપી કરવા લાગ્યા હતા.
આ હિંસક ઝપાઝપી અને હુમલા દરમિયાન જેસીંગભાઈ રાતડીયાએ કૈલાશભાઈને ખુલ્લેઆમ ધમકી આપતા ઉચ્ચાર્યું હતું કે, “હવે તું અહીંયા કેમ ધંધો કરે છે તે હું જોઉં છું.” આ ધમકી આપવાની સાથે જ હુમલાખોરોમાંથી એક શખ્સે પોતાના હાથમાં પહેરેલું લોખંડનું ભારે કડું (સરલ) કૈલાશભાઈના કપાળના ભાગે તથા માથાના પાછળના ભાગે જોરથી મારી દીધું હતું. આ સખત પ્રહારના કારણે કૈલાશભાઈનું માથું ફાટી ગયું હતું અને તેઓ સ્થળ પર જ લોહીલુહાણ થઈ ઢળી પડ્યા હતા, તેમજ તેમના શરીરે પણ ગંભીર મૂઢ ઈજાઓ પહોંચી હતી.
આ ઘટના બની તે જ સમયે સદનસીબે ભોગ બનનાર કૈલાશભાઈના ફુઈનો દીકરો અજયભાઈ ગઢવી ત્યાંથી પસાર થઈ રહ્યો હતો. તેણે સ્થિતિ ગંભીર જોઈ તાત્કાલિક ૧૦૮ એમ્બ્યુલન્સને ફોન કરીને કૈલાશભાઈને સારવાર અર્થે રાજકોટની સરકારી હોસ્પિટલમાં ખસેડ્યા હતા. પ્રાથમિક સારવાર મેળવ્યા બાદ તેઓ ઘરે ગયા હતા, પરંતુ માથાના ભાગે થયેલી ગંભીર ઈજાના કારણે અસહ્ય દુખાવો ઉપડતા તેમને વધુ અને ગહન સારવાર માટે વિદ્યાનગર મેઈન રોડ પર આવેલી ગોકુલ હોસ્પિટલમાં દાખલ કરવામાં આવ્યા છે.
આ લોહિયાળ બનાવ અંગે રાજકોટ શહેરના બી-ડીવીઝન પોલીસ સ્ટેશનમાં કૈલાશભાઈની ફરિયાદના આધારે તમામ પાંચ નામજોગ આરોપીઓ જેસીંગભાઈ રાતડીયા, વિપુલ રાતડીયા, લાલજીભાઈ રાતડીયા, યોગેશભાઈ રાતડીયા, રવીભાઈ રાતડીયા તથા એક અજાણ્યા શખ્સ સામે ભારતીય ન્યાય સંહિતા ની વિવિધ કલમો હેઠળ ગેરકાયદે મંડળી રચવા અને હુમલો કરવા અંગે ગુનો નોંધવામાં આવ્યો છે. આ મામલે પોલીસ સબ ઈન્સ્પેક્ટર માનસિંહ નુરજી વસાવાએ આગળની કાયદેસરની તપાસ હાથ ધરી આરોપીઓને ઝડપી પાડવા ચક્રો ગતિમાન કર્યા છે.
