હવામાન વિભાગના અનુસંધાન પ્રમાણે, આજે સમગ્ર ગુજરાતમાં વરસાદી માહોલ છવાયેલો રહેશે. રાજ્યના અનેક વિસ્તારોમાં ઓરેન્જ એલર્ટ જાહેર કરાયો છે. દક્ષિણ ગુજરાત તેમજ સૌરાષ્ટ્રના ભાગોમાં ભારે વરસાદની શકયતા વ્યક્ત કરવામાં આવી છે.
ભરૂચ, સુરત, નવસારી, વલસાડ સહિત અમરેલી, ભાવનગર, બોટાદ અને સુરેન્દ્રનગર જિલ્લામાં આજે ઓરેન્જ એલર્ટ લાગુ છે. ઉપરાંત અમદાવાદ, ગાંધીનગર અને ખેડા જિલ્લાઓ માટે પણ ભારે વરસાદનો એલર્ટ અપાયો છે. બીજી તરફ અરવલ્લી, મહિસાગર, જામનગર અને મોરબીમાં પણ વરસાદ તીવ્ર હોવાની આગાહી છે.
હવામાન નિષ્ણાત અંબાલાલ પટેલે જણાવ્યું કે, 23 જુલાઈથી રાજ્યમાં વરસાદનું જોર વધી શકે છે. તેમણે આ આગાહી કરતા જણાવ્યું કે, બંગાળના ઉપસાગરમાં સર્જાયેલું સિસ્ટમ ગુજરાત તરફ આગળ વધી રહ્યું છે, જેના કારણે સૌરાષ્ટ્ર, મધ્ય, ઉત્તર અને દક્ષિણ ગુજરાતના વિસ્તારોમાં ભારેથી અતિભારે વરસાદની શક્યતા છે. નર્મદા અને સાબરમતી નદીઓમાં પાણીનો સ્તર ઊંચો જઈ શકે છે અને ગાંડીતૂર સ્થિતિ સર્જાઈ શકે છે.
