ભરૂચમાં વધુ એક માર્ગ અકસ્માતની ઘટના પ્રકાશમાં આવી છે. જંબુસર-આમોદ રોડ પર ઇકો કાર અને ટ્રક વચ્ચે જોરદાર ટક્કર થતાં 6 લોકોના ઘટનાસ્થળે જ મોત થયાની પ્રાથમિક માહિતી છે. જ્યારે 3 લોકોને ગંભીર ઈજાઓ થતાં સારવાર માટે હોસ્પિટલમાં ખસેડવામાં આવ્યા છે.
જંબુસર-આમોદ રોડ પર ઈકો કાર-ટ્રકની ટક્કર
ભરૂચ જિલ્લામાં ગોઝારાનો બનાવ બન્યો હતો. પ્રાથમિક અહેવાલ મુજબ જંબુસર-આમોદ રોડ પર અકસ્માત થયો હતો. જ્યાં એક ઈકો કાર ટ્રક સાથે અથડાઈ હતી. આ અકસ્માતમાં 6 લોકોના ઘટનાસ્થળે જ મોત થયા હોવાના અહેવાલ છે. ત્રણ લોકોને ગંભીર ઈજાઓ થતાં સારવાર માટે હોસ્પિટલમાં ખસેડવામાં આવ્યા છે. જણાવવામાં આવી રહ્યું છે કે મગનડ ગામ પાસે ક્રિષ્ના હોટલ પાસે ઈકો કાર અને ટ્રક વચ્ચે ટક્કર થઈ હતી.
ઈકો કારમાં 6 લોકોના મોત!
પ્રાથમિક માહિતી અનુસાર, ઈકો કારમાં મુસાફરી કરી રહેલા 6 લોકોના ઘટનાસ્થળે જ મોત થયા છે. ભરૂચથી ઈકો કાર આવતી હતી. અકસ્માતમાં ઈજાગ્રસ્તોને જંબુસર રેફરલ હોસ્પિટલમાં સારવાર માટે દાખલ કરવામાં આવ્યા છે. બનાવ બાદ જંબુસર પોલીસની ટીમ પણ ઘટના સ્થળે પહોંચી મૃતદેહને પીએમ અર્થે મોકલી આપી જરૂરી કાયદેસરની કાર્યવાહી હાથ ધરી હતી.
