સુરતમાં સતત વધી રહેલા તાપમાનને કારણે લોકો ત્રાહિમામ પોકારી ઉઠ્યા છે. આકરી ગરમીની સૌથી વધુ અસર નાના બાળકો અને વૃદ્ધો પર જોવા મળી રહી છે. વેકેશન હોવા છતાં વાલીઓ બપોરના સમયે બાળકોને બહાર રમવા મોકલી રહ્યા નથી અને બાળકો ઘરમાં જ વિવિધ ગેમ રમી સમય પસાર કરી રહ્યા છે. કેટલીક સોસાયટીઓમાં તમામ બાળકો એક જ ઘરમાં ભેગા થઈને રમતા જોવા મળી રહ્યા છે. ગરમીથી બાળકોનું સ્વાસ્થ્ય જળવાઈ રહે તે માટે વાલીઓ દ્વારા તેમને જ્યુસ, લીંબુ પાણી અને ઠંડા પીણાં આપવામાં આવી રહ્યા છે.
વડોદરાઃ આજવા રોડ વિસ્તારમાં અસામાજિક તત્વોનો આતંક
વડોદરાના આજવા રોડ વિસ્તારમાં અસામાજિક તત્વોનો આતંક સામે આવ્યો છે. શ્રી હરિ ટાઉનશીપમાં જ્વેલર્સની દુકાન ધરાવતા વેપારી પર દુકાન બહાર CCTV કેમેરા લગાવવાની અદાવતમાં હુમલો કરવામાં આવ્યો હોવાનો આરોપ છે. બાપોદ પોલીસ મથક પાસે જ પથ્થરમારો થતાં એક વ્યક્તિ ઈજાગ્રસ્ત થયો હતો, જેને સારવાર માટે હોસ્પિટલ ખસેડવામાં આવ્યો હતો. આરોપ છે કે હોસ્પિટલ સુધી રેકી કરીને અન્ય એક વ્યક્તિ પર પણ હુમલો કરવામાં આવ્યો હતો. સાથે જ એકતાનગર પાસે રોકીને બેગ લૂંટવાનો પ્રયાસ પણ લુખ્ખાઓએ કર્યો હોવાનું સામે આવ્યું છે. સમગ્ર ઘટનાને લઈને વેપારીએ પોલીસ પાસે આરોપીઓ સામે કડક કાર્યવાહી કરવાની માંગ કરી છે.
