📍રાજકોટમાં પત્રકારત્વને લાંછન લગાવતા ‘તોડબાજો’નો પર્દાફાશ: વેપારીને બ્લેકમેલ કરી ખંડણી માંગનાર ત્રણ શખ્સો ઝડપાયા

રાજકોટ શહેરમાં પત્રકારિતાના નામે વેપારીઓને ટાર્ગેટ કરી બ્લેકમેલિંગ અને ગેરકાયદેસર રીતે ખંડણી માંગવાનો ચોંકાવનારો મામલો સામે આવ્યો છે. રાજકોટ શહેર ક્રાઇમ બ્રાન્ચે આવા કથિત પત્રકારો સામે કડક કાર્યવાહી હાથ ધરી ત્રણ ઇસમો વિરુદ્ધ ગુનો નોંધી કાયદેસરની કાર્યવાહી શરૂ કરી છે.

રાજકોટ શહેર પોલીસ કમિશ્નર બ્રજેશકુમાર ઝા, અધિક પોલીસ કમિશ્નર ચૈતન્ય મંડલીક, નાયબ પોલીસ કમિશ્નર (ક્રાઇમ) જગદીશ બાંગરવા અને મદદનીશ પોલીસ કમિશ્નર (ક્રાઇમ) ભરત બી. બસિયાના માર્ગદર્શન હેઠળ આ કાર્યવાહી કરવામાં આવી છે. પોલીસને સતત એવી ફરીયાદો મળી રહી હતી કે કેટલાક કહેવાતા કથિત પત્રકારો પ્રજાજનો અને વેપારીઓને ટાર્ગેટ બનાવી તેઓની વિરુદ્ધ સમાચાર અથવા ન્યૂઝ પ્રસારિત કરવાની ધમકી આપી ગેરકાયદેસર રીતે ખંડણીની માંગણી કરતા હતા.

આ મામલે રાજકોટ શહેરમાં ડીસકનેક્શનના ધંધા સાથે સંકળાયેલા એક વેપારીએ ફરીયાદ નોંધાવતા સમગ્ર કૌભાંડ બહાર આવ્યું હતું. ફરિયાદ મુજબ, કથિત પત્રકારો દ્વારા વેપારીને બદનામ કરવાની અને ન્યૂઝ ચલાવવાની ધમકી આપી રૂપિયાની માંગણી કરવામાં આવી હતી. જેના આધારે ડી.સી.બી. પોલીસ સ્ટેશનના પીએસઆઈ આર.કે. ગોહિલ અને રાઇટર અશોક કલાલ દ્વારા ગુનો નોંધી ત્રણેય આરોપીઓ સામે કાર્યવાહી હાથ ધરવામાં આવી છે.

પોલીસે જે ત્રણ આરોપીઓ સામે કાર્યવાહી કરી છે તેમાં ભારત હેડલાઇન સાથે સંકળાયેલા અમીતભાઈ બીપીનભાઈ ઠકકર (ઉ.વ. 40), રહે. રૈયા હિલ, દ્વારકેશ પાર્ક પાસે રાજકોટ, રાજકોટ લાઇવ ન્યૂઝ સાથે સંકળાયેલા ભાર્ગવભાઈ હરીશચંદ્રભાઈ આચાર્ય (ઉ.વ. 53), રહે. વિમલનગર શેરી નં. 2, યુનિવર્સિટી રોડ રાજકોટ તેમજ યોગીરાજસિંહ વિજયસિંહ રાઠોડ (ઉ.વ. 23), રહે. ઠાકોર દ્વાર-1 સોસાયટી, મોરબી રોડ સેટેલાઇટ ચોક રાજકોટનો સમાવેશ થાય છે.

પોલીસ તપાસમાં આરોપીઓનો ગુનાહિત ઇતિહાસ પણ સામે આવ્યો છે. આરોપી અમીતભાઈ ઠકકર વિરુદ્ધ અગાઉ કુવાડવા રોડ પોલીસ સ્ટેશનમાં એમ.વી. એક્ટ તેમજ IPC હેઠળ ગુનો નોંધાયો હતો. ઉપરાંત વર્ષ 2025માં રાજકોટ સાયબર ક્રાઇમ પોલીસ સ્ટેશનમાં BNSની કલમ 305(5), 308(4), 351(2), 356(3), 54, 61 તથા IT એક્ટની કલમ 66(C) અને 67(A) હેઠળ પણ ગુનો નોંધાયો હતો.

ત્યારે આરોપી યોગીરાજસિંહ રાઠોડ વિરુદ્ધ વર્ષ 2022માં બી-ડિવિઝન પોલીસ સ્ટેશનમાં ગુજરાત પોલીસ એક્ટની કલમ 135 હેઠળ ગુનો નોંધાયેલ હોવાનું પણ તપાસમાં સામે આવ્યું છે.

આ સમગ્ર મામલે રાજકોટ શહેર DCB પોલીસ સ્ટેશનમાં ગુનો રજીસ્ટર નંબર 11208055260215/2026 હેઠળ ભારતીય ન્યાય સંહિતા (BNS) 2023 ની કલમ 308(4), 356 અને 54 મુજબ ગુનો નોંધવામાં આવ્યો છે.

સમગ્ર કાર્યવાહી રાજકોટ શહેર ક્રાઇમ બ્રાન્ચના પોલીસ ઇન્સ્પેક્ટર એમ.આર. ગોંડલીયા, એમ.એલ. ડામોર અને સી.એચ. જાદવના માર્ગદર્શન હેઠળ કરવામાં આવી હતી. કામગીરીમાં પીએસઆઈ આર.કે. ગોહિલ, એએસઆઈ અશોક કલાલ, રણજીતસિંહ પઢારીયા, સંજય દાફડા, વિજયરાજસિંહ જાડેજા, સુભાષ ધોધારી, તુલશી ચુડાસમા, મુકેશ સબાડ અને સંજય ખાખરીયા સહિતનો સ્ટાફ જોડાયો હતો.

રાજકોટ ક્રાઇમ બ્રાન્ચે સ્પષ્ટ સંદેશ આપ્યો છે કે પત્રકારિતાના નામે બ્લેકમેલિંગ, ધમકી અને ખંડણી જેવી ગેરકાયદેસર પ્રવૃત્તિઓ ચલાવનાર કોઈપણ વ્યક્તિને બક્ષવામાં નહીં આવે અને આવા તત્વો સામે કડક કાર્યવાહી ચાલુ રહેશે.