રાજકોટ જિલ્લામાં એસ.આઈ.આર.ની કામગીરી પૂર્ણ, મતદારોની ચકાસણી ૧૦૦ ટકા પૂર્ણ હોવાનું વહીવટી તંત્રનો દાવો
રાજકોટ :
રાજકોટ જિલ્લામાં સ્પેશિયલ ઇન્ટેન્સિવ રિવિઝન (SIR) અંતર્ગત ચાલી રહેલી મતદારોની ચકાસણી અને સુધારાની પ્રક્રિયા પૂર્ણ થઈ ગઈ હોવાનું વહીવટી તંત્ર દ્વારા જણાવવામાં આવ્યું છે. અધિકારીઓના જણાવ્યા અનુસાર જિલ્લામાં મતદારોના વેરિફિકેશનની કામગીરી ૧૦૦ ટકા પૂર્ણ કરવામાં આવી છે.
જિલ્લાની કુલ આઠ વિધાનસભા બેઠકોમાં મતદારોની માહિતી અપડેટ કરવા માટે ગણતરી ફોર્મનું વિતરણ કરવામાં આવ્યું હતું. આ પ્રક્રિયા અંતર્ગત કુલ ૨૩,૯૧,૦૨૭ મતદારોને ફોર્મ આપવામાં આવ્યા હતા, જેમાંથી મોટાભાગના મતદારોની વિગતો સફળતાપૂર્વક ચકાસવામાં આવી છે.
૨૯ હજારથી વધુ લોકોએ નામ ઉમેરવા માટે અરજી કરી
એસ.આઈ.આર. કામગીરી દરમિયાન જિલ્લામાં મતદાર યાદીમાં નામ ઉમેરવા માટે લોકોમાં સારો પ્રતિસાદ જોવા મળ્યો હતો. વહીવટી તંત્રના આંકડા મુજબ ૨૯ હજારથી વધુ અરજદારો દ્વારા નવા નામ ઉમેરવા માટે અરજી કરવામાં આવી હતી. આ અરજીઓની ચકાસણી બાદ યોગ્ય પ્રક્રિયા મુજબ મતદાર યાદીમાં સુધારા કરવામાં આવ્યા છે.
૩ લાખથી વધુ મતદાર મૃત, ગેરહાજર અથવા સ્થળાંતર થયેલા હોવાનું સામે આવ્યું
મતદારોના વેરિફિકેશન દરમિયાન મહત્વપૂર્ણ ખુલાસો થયો છે. ચકાસણી દરમિયાન ૩,૨૫,૬૭૦ મતદારો મૃત, ગેરહાજર અથવા સ્થળાંતર થયેલા હોવાનું સામે આવ્યું છે. આ તમામ નામોને મતદાર યાદીમાંથી દૂર કરવાની પ્રક્રિયા હાથ ધરવામાં આવી હતી, જેથી મતદાર યાદી વધુ પારદર્શક અને ચોક્કસ બની શકે.
એસ.આઈ.આર. બાદ જિલ્લામાં ૨૦,૫૫,૩૫૭ મતદાર નોંધાયા
એસ.આઈ.આર.ની કામગીરી પૂર્ણ થયા બાદ રાજકોટ જિલ્લામાં હવે કુલ ૨૦,૫૫,૩૫૭ મતદાર નોંધાયા છે. વહીવટી તંત્રના જણાવ્યા અનુસાર, આ સુધારેલી મતદાર યાદી આગામી ચૂંટણી પ્રક્રિયામાં ઉપયોગમાં લેવામાં આવશે, જેથી ચૂંટણી વધુ નિષ્પક્ષ અને પારદર્શક રીતે યોજી શકાય.
જિલ્લા વહીવટી તંત્રએ મતદારોને અપીલ કરી છે કે જો કોઈ મતદારને પોતાના નામ, સરનામા અથવા અન્ય વિગતોમાં કોઈ ભૂલ જણાય તો તે સમયસર ચૂંટણી વિભાગનો સંપર્ક કરી સુધારા કરાવે.
