ઓવલ ટેસ્ટ મેચમાંથી બહાર થયા બાદ, બેન સ્ટોક્સે આ પાંચ મેચની ટેસ્ટ શ્રેણીના સમયપત્રક પર નારાજગી વ્યક્ત કરી છે. તેમણે કહ્યું કે ટેસ્ટ મેચો વચ્ચેનો તફાવત વધુ સારો હોઈ શક્યો હોત. કેટલીક મેચોમાં 8 થી 9 દિવસનો તફાવત હતો અને પછી છેલ્લી મેચોમાં અમને ફક્ત 3 થી 4 દિવસનો વિરામ મળ્યો હતો, જ્યારે બધી મેચોમાં 4 થી 5 દિવસનો વિરામ રાખી શકાયો હોત, જેથી સાતત્ય જળવાઈ રહે. આનાથી બંને ટીમોને રાહત મળી હોત.
લીડ્સમાં રમાયેલી પહેલી ટેસ્ટ મેચ પછી, બીજી ટેસ્ટ મેચ શરૂ થવામાં સાત દિવસનો સમય લાગ્યો હતો, ત્યારબાદ ત્રીજી ટેસ્ટ મેચ પહેલા ફક્ત ત્રણ દિવસનો સમય લાગ્યો હતો. આ પછી, ચોથી ટેસ્ટ મેચ પહેલા ખેલાડીઓને આઠ દિવસનો આરામ મળ્યો હતો, પરંતુ ફરી એકવાર ખેલાડીઓને પાંચમી ટેસ્ટ મેચ માટે ફક્ત ત્રણ દિવસનો સમય મળ્યો હતો, જેના કારણે તેમની ઈજાની સમસ્યા વધી ગઈ હતી. લોર્ડ્સ અને માન્ચેસ્ટરમાં લાંબા સ્પેલમાં બોલિંગ કર્યા પછી સ્ટોક્સના જમણા ખભા પર ખરાબ અસર પડી હતી, જેના કારણે તેના સ્નાયુઓમાં ઈજા થઈ હતી. જેના કારણે તે છેલ્લી ટેસ્ટ મેચમાંથી બહાર થઈ ગયો છે.
સ્ટોક્સે ભારત સામેની ચાર ટેસ્ટ મેચમાં કુલ 140 ઓવર ફેંકી હતી, જેમાં તેણે 17 વિકેટ લીધી હતી. આ દરમિયાન તેણે 581 બોલનો સામનો કર્યો હતો, જેમાં તેણે સદી સાથે 304 રન બનાવ્યા હતા. બેન સ્ટોક્સ ઉપરાંત, જોફ્રા આર્ચર પણ ઓવલ ટેસ્ટ મેચમાં રમી રહ્યો નથી, જ્યારે જસપ્રીત બુમરાહ પણ ટીમ ઈન્ડિયા તરફથી આ ટેસ્ટ મેચમાં રમશે નહીં.
