નામચીન શખસની પ્રેમ પ્રકરણમાં પત્નીના પ્રેમીએ હત્યા નિપજાવી

મૂળ જેતપુરના પેઢલા ગામના વતની અને હાલ આજીડેમ સર્કલ પાસે રહેતાં હિસ્ટ્રીશીટર મુકેશ ગુજરાતીની પત્ની શોભનાને અગાઉ રીક્ષા ચાલક સાગર મકવાણા ભગાડી ગયો ’તો : ગત સાંજે બંને પરત આવતા તેની સાથે થયેલા ડખ્ખા ખાર રાખી અમુલ સર્કલ પાસે તિક્ષ્ણ હથિયારના ઘા ઝીંકી મોતને ઘાટ ઉતારી દીધો : ઘટના બાદ ડીસીપી જગદીશ બાંગરવા, થોરાળા પોલીસ, ક્રાઈમ બ્રાન્ચ સહિતનો પોલીસ કાફલો દોડી ગયો અને મોડી રાતે આરોપીને ગોંડલ નજીકથી દબોચી લીધો

(આઝાદ સંદેશ), રાજકોટ : રાજકોટમાં ગત રાતે વધુ એક હત્યાનો બનાવ બન્યો છે. જેમાં આજી ડેમ સર્કલ પાસે ફૂટપાથ પર રહેતો અને મજૂરીકામ કરતા નામચીન શખસને પ્રેમપ્રકરણમાં તીક્ષ્ણ હથિયારના ઘા ઝીંકી પત્નીના પ્રેમીએ હત્યા કરી નાસી જતા થોરાળા પોલીસ અને ક્રાઈમ બ્રાન્ચની ટીમે ઘટનાસ્થળે પહોંચી તપાસ હાથ ધરી હતી. બનાવની જાણ થતાં ડીસીપી, એસીપી પણ દોડી આવ્યાં હતાં. મોડી રાતે આરોપીને ક્રાઈમ બ્રાન્ચની ટીમે ગોંડલ પાસેથી દબોચી લઈ કાર્યવાહી હાથ ધરી હતી. મળતી માહિતી મુજબ, જેતપુરના પેઢલા ગામે પાંચ પીપળા રોડ પર રહેતાં રામજીભાઈ અરજણભાઈ ગુજરાતીએ થોરાળા પોલીસ મથકે સાગર મનસુખ મકવાણા સામે પોતાના ભાઈ મુકેશ ગુજરાતી (ઉ.વ.41)ની હત્યા કર્યાની ફરિયાદ નોંધાવી છે. જેમાં ફરીયાદીએ જણાવ્યું હતું કે, તેમનો મોટો ભાઈ મુકેશભાઈ ગુજરાતી (ઉ.વ.42) આજી ડેમ ચોકડી પાસે ફૂટપાથ પર રહેતો હતો. ગઈ રાત્રીના તે 80 ફુટ રોડ પર ત્રિશુલ કારખાનાની સામે પીટીસીની દિવાલ પાસે હતો ત્યારે માથામાં તીક્ષ્ણ હથિયારના ઘા ઝીંકી હત્યા કરી અજાણ્યા શખ્સો નાસી ગયા હતા. ગંભીર રીતે ઘવાયેલા તેના ભાઈને સારવાર અર્થે ખસેડાતા ફરજ પરના તબીબોએ તેમને મૃત જાહેર કર્યો હતો. બનાવની જાણ થતા ડિસીપી જગદીશ બાંગરવા, ક્રાઈમ બ્રાંચ પીઆઈ ડામોર, થોરાળા પીઆઈ વાઘેલા સહિતનો પોલીસ કાફલો ઘટનાસ્થળે પહોંચી તપાસ હાથ ધરી હતી. દરમિયાન બનાવ બાદ એક રિક્ષા શંકાસ્પદ હાલતમાં નીકળી હોવાનું બહાર આવતા પોલીસે વધુ કાર્યવાહી કરી હતી. પોલીસની તપાસમાં મૃતક યુવાન મજૂરીકામ કરતો અને તેની પત્ની અને બે બાળકો સાથે રહેતો હોવાનું જાણવા મળ્યું હતું. દરમિયાન વધુ તપાસ કરતા જાણવા મળ્યું હતું કે મૃતક નામચીન હતો અગાઉ અનેક ગુના આચરેલા હતા અને હમણાં કેટલાક સમયથી કંઈ કામ કરતો ન હોવાનું અને તેની પત્નીને કોઈ રિક્ષાચાલક સાગર મકવાણા સાથે પ્રેમસંબંધ હોય તેને સાગર ભગાડી ગયો હતો. જે બાબતે ડખ્ખો થતાં સાગરે યુવકનું ઢીમઢાળી દીધું હોવાનું સામે આવ્યું હતું. ક્રાઈમ બ્રાન્ચની ટીમે બાતમીના આધારે ગોંડલ પાસેથી આરોપી સાગરને મોડી રાતે જ પકડી કાયદેસરની કાર્યવાહી કરી હતી. બનાવથી મૃતકના બે સંતાનોએ પિતાની છત્રછાયા ગુમાવતાં પરિવારમાં શોક વ્યાપી ગયો હતો.