હિમાચલ પ્રદેશ કિન્નૌર વાદળ ફાટવાના કારણે ઘણી જગ્યાએ નદીઓ અને નાળા છલકાઈ ગયા છે. ભારે વરસાદને કારણે ઘણી દુકાનોને નુકસાન થયું છે. રાજ્યમાં 325 રસ્તાઓ બંધ કરવામાં આવ્યા છે. હવામાન વિભાગે ઘણા જિલ્લાઓ માટે ભારે વરસાદની ચેતવણી જારી કરી છે.
વહીવટીતંત્ર સતર્ક
હિમાચલમાં વાદળ ફાટવાની અને અચાનક પૂરની તાજેતરની ઘટનાઓ બાદ વહીવટીતંત્ર એલર્ટ પર છે. આ ઘટનાઓને કારણે શિમલા, લાહૌલ અને સ્પીતિ જિલ્લામાં અનેક પુલ ધોવાઈ ગયા છે, જ્યારે 300 થી વધુ રસ્તાઓ બંધ કરવામાં આવ્યા છે. ગણવી ખીણમાં તાજેતરના પૂરને કારણે એક પોલીસ ચોકી ધોવાઈ ગઈ છે. જ્યારે શિમલામાં ભારે વરસાદ બાદ ઘણી દુકાનોને નુકસાન થયું છે. આ ઘટનાઓમાં અત્યાર સુધી કોઈ જાનહાનિના સમાચાર નથી.
આપત્તિઓને કારણે 325 રસ્તાઓ બંધ
રાજ્યના આદિવાસી લાહૌલ અને સ્પીતિ જિલ્લાના માયાડ ખીણના કરપટમાં વાદળ ફાટ્યા બાદ ચાંગુટ અને ઉદગોસ નાળામાં અચાનક આવેલા પૂરને કારણે બે પુલ ધોવાઈ ગયા હતા. સતત વરસાદને કારણે લોકો સુરક્ષિત સ્થળોએ સ્થળાંતરિત થયા છે. સ્થાનિક લોકોએ જણાવ્યું હતું કે આ આફતોને કારણે ઘણી એકર ખેતીલાયક જમીનનો નાશ થયો છે.
વહીવટીતંત્ર સતત રાહત અને બચાવ કાર્યમાં વ્યસ્ત છે. રાજ્યમાં આવેલી આફતોને કારણે, બે રાષ્ટ્રીય ધોરીમાર્ગો સહિત 325 રસ્તાઓ બંધ કરવામાં આવ્યા છે. સ્ટેટ ઇમરજન્સી ઓપરેશન સેન્ટર (SEOC) અનુસાર, આમાંથી 179 રસ્તાઓ મંડી જિલ્લામાં અને 71 નજીકના કુલ્લુ જિલ્લામાં છે.
