દિલ્હીના ચૂંટણી દંગલમાં કોંગ્રેસના રાષ્ટ્રીય ખજાનચી અજય માકન 18 દિવસ બાદ પરત ફર્યા છે. બુધવારે પ્રેસ કોન્ફરન્સમાં માકને અરવિંદ કેજરીવાલ અને આમ આદમી પાર્ટી પર ગંભીર આરોપો લગાવ્યા હતા. તમને જણાવી દઈએ કે 4 જાન્યુઆરીએ માકન અરવિંદ કેજરીવાલ વિરુદ્ધ પ્રેસ કોન્ફરન્સ કરવાના હતા, પરંતુ હાઈકમાન્ડની પહેલ પર તે પ્રેસ કોન્ફરન્સ રદ કરવામાં આવી હતી.
પત્રકારો સાથે વાત કરતાં અજય માકને કહ્યું હતું કે દિલ્હીને લગતા CAGના અહેવાલો પૈકી એક અહેવાલ ખૂબ જ ગંભીર છે. આ રિપોર્ટ દર્શાવે છે કે રાષ્ટ્રીય રાજધાનીમાં 382 કરોડ રૂપિયાનું આરોગ્ય કૌભાંડ થયું છે.
માકનના જણાવ્યા અનુસાર, દિલ્હીમાં ત્રણ હોસ્પિટલોનું નિર્માણ કોંગ્રેસના શાસન દરમિયાન શરૂ થયું હતું, પરંતુ કેજરીવાલ સરકારના શાસનમાં તેના નિર્માણમાં સતત વિલંબ થતો રહ્યો, જેના કારણે ટેન્ડરના નાણાં વધતા ગયા. કેજરીવાલ સરકારે જણાવવું જોઈએ કે આ ભ્રષ્ટાચાર કેવી રીતે થયો?અજય માકને વધુમાં કહ્યું કે ઈન્દિરા ગાંધી હોસ્પિટલ, બુરારી હોસ્પિટલ અને મૌલાના આઝાદ ડેન્ટલ હોસ્પિટલના નિર્માણમાં ભ્રષ્ટાચાર કરવામાં આવ્યો છે. જેમાં સૌથી વધુ રૂ. 314 કરોડનું રોકાણ ટેન્ડર દ્વારા ઈન્દિરા ગાંધી હોસ્પિટલના નિર્માણમાં કરવામાં આવ્યું હતું.
