રાજકોટમાં ભારત–ન્યુઝીલેન્ડ મેચને લઈને કડક સુરક્ષા વ્યવસ્થા, 1200થી વધુ પોલીસ બંદોબસ્ત તૈનાત
રાજકોટમાં આવતીકાલે ભારત અને ન્યુઝીલેન્ડ વચ્ચે યોજાનારી આંતરરાષ્ટ્રીય ક્રિકેટ મેચને લઈ શહેર પોલીસ દ્વારા વિશાળ સુરક્ષા અને ટ્રાફિક વ્યવસ્થા ગોઠવવામાં આવી છે. મેચ પૂર્વે રાજકોટ જિલ્લા પોલીસ વડા વિજયસિંહ ગુર્જરે પ્રેસ કોન્ફરન્સ કરીને સમગ્ર બંદોબસ્ત અંગે વિગતવાર માહિતી આપી હતી.
પંચાયત વિભાગ દ્વારા દર્શકો માટે કુલ 7 પાર્કિંગ સ્થળો ફાળવવામાં આવ્યા છે, જેમાં અંદાજે 5000 ફોર વ્હીલ અને 5000 ટુ વ્હીલ વાહનો માટે વ્યવસ્થા કરાઈ છે. પાર્કિંગનો ચાર્જ પંચાયત તરફથી વસુલવામાં આવશે. ટ્રાફિક નિયંત્રણના ભાગરૂપે રાજકોટ–જામનગર રોડ પર આવતીકાલે ભારે વાહનો માટે પ્રતિબંધ મૂકવામાં આવ્યો છે. સાથે જ નવા 150 ફૂટ રોડ તેમજ પડધરી તરફથી ડાયવર્ઝન આપવામાં આવ્યું છે.
મેચ દરમિયાન સ્ટેડિયમ અને આસપાસના વિસ્તારોમાં CCTV કેમેરા દ્વારા સતત નજર રાખવામાં આવશે. સ્ટેડિયમમાં પ્રતિબંધિત વસ્તુઓ લઈ જવા પર સંપૂર્ણ મનાઈ રહેશે. ચોરી અટકાવવા માટે ખાસ 5 ટીમો બનાવવામાં આવી છે, જે સ્ટેડિયમ વિસ્તારમાં સક્રિય રહેશે.
ટિકિટ કાળા બજારી તેમજ ઓનલાઈન ટિકિટ કૌભાંડ કરનાર સામે કડક કાર્યવાહી કરવામાં આવશે તેવી ચેતવણી પણ પોલીસ દ્વારા આપવામાં આવી છે. સુરક્ષા બંદોબસ્તમાં 1 SP, 3 ASP, 4 DYSP, 14 PI, 42 PSI સહિત 700થી વધુ પોલીસ કર્મચારીઓ તૈનાત રહેશે, જ્યારે કુલ મળીને 1200થી વધુ પોલીસ સ્ટાફ મેચ દરમિયાન ફરજ પર રહેશે.
રાજકોટમાં યોજાનારી આ હાઈ-પ્રોફાઈલ મેચને લઈ પોલીસ દ્વારા તમામ તૈયારીઓ પૂર્ણ કરી દેવામાં આવી છે. જિલ્લા પોલીસ વડા વિજયસિંહ ગુર્જરે જણાવ્યું હતું કે, દર્શકોને સુરક્ષિત અને સુવ્યવસ્થિત અનુભવ મળે તે માટે પોલીસ સંપૂર્ણ સતર્ક છે.
