છૂટાછેડા લેનારાઓ માટે ગુજરાત હાઈકોર્ટનો ઐતિહાસિક ચુકાદો
પરસ્પર સંમતિથી છૂટાછેડા માટે વેઇટિંગ પીરિયડ ફરજિયાત નહીં: હાઈકોર્ટ
અમદાવાદ:
છૂટાછેડા લેવા ઇચ્છતા દંપતિઓ માટે ગુજરાત હાઈકોર્ટએ એક મહત્વપૂર્ણ અને ઐતિહાસિક ચુકાદો આપ્યો છે. હાઈકોર્ટે સ્પષ્ટ કર્યું છે કે પરસ્પર સંમતિથી છૂટાછેડા લેવાના મામલામાં વેઇટિંગ પીરિયડ (કૂલિંગ પીરિયડ) ફરજિયાત નથી. જો દંપતિ વચ્ચે પુનઃ મિલનની કોઈ શક્યતા ન હોય, તો કોર્ટ કૂલિંગ પીરિયડને જતો કરી શકે છે.
હાઈકોર્ટએ પોતાના ચુકાદામાં જણાવ્યું છે કે પરસ્પર સંમતિથી છૂટાછેડા લેવા ઇચ્છતા પક્ષકારોને બિનજરૂરી રીતે રાહ જોવડાવવી ન્યાયના હિતમાં નથી. જ્યારે બંને પક્ષો સ્પષ્ટ રીતે અલગ થવાનો નિર્ણય કરી ચૂક્યા હોય અને લગ્નજીવન આગળ વધારવાની કોઈ શક્યતા ન હોય, ત્યારે માત્ર પ્રક્રિયાત્મક વિલંબ માટે તેમને માનસિક તણાવમાં રાખવો યોગ્ય નથી.
ફેમિલી કોર્ટનો હુકમ રદ
આ કેસમાં વર્ષ 2023માં લગ્ન કરેલા એક દંપતિએ પરસ્પર સંમતિથી છૂટાછેડા માટે અરજી કરી હતી. જોકે, ફેમિલી કોર્ટે કૂલિંગ પીરિયડનો હવાલો આપી તેમની અરજી ફગાવી દીધી હતી. ફેમિલી કોર્ટના આ નિર્ણયને પડકારતા દંપતિએ ગુજરાત હાઈકોર્ટનો દરવાજો ખખડાવ્યો હતો.
હાઈકોર્ટએ ફેમિલી કોર્ટના હુકમને રદ કરીને મામલો ફરીથી વિચારણા માટે મોકલી આપ્યો છે અને નવેસરથી નિર્ણય લેવા સ્પષ્ટ આદેશ આપ્યો છે. સાથે જ હાઈકોર્ટએ નોંધ્યું કે દરેક કેસની પરિસ્થિતિ અલગ હોય છે અને કોર્ટએ હકીકતોને ધ્યાનમાં રાખીને નિર્ણય લેવો જોઈએ.
છૂટાછેડા કાયદામાં મહત્વપૂર્ણ માર્ગદર્શન
આ ચુકાદાને છૂટાછેડા સંબંધિત કાયદામાં મહત્વપૂર્ણ માર્ગદર્શનરૂપ માનવામાં આવી રહ્યું છે. આ નિર્ણયથી પરસ્પર સંમતિથી છૂટાછેડા લેવા ઇચ્છતા દંપતિઓને લાંબી પ્રક્રિયા અને માનસિક પીડાથી રાહત મળવાની શક્યતા છે.
કાનૂની નિષ્ણાતોના જણાવ્યા અનુસાર, ગુજરાત હાઈકોર્ટનો આ ચુકાદો ભવિષ્યમાં સમાન પ્રકારના કેસોમાં માર્ગદર્શક દિશા પૂરું પાડશે અને ફેમિલી કોર્ટોને વધુ વ્યવહારુ અને માનવતાભર્યો અભિગમ અપનાવવા પ્રેરણા આપશે.
