Date 19-11-2024 નરેન્દ્ર મોદીએ સ્પષ્ટ કર્યું કે, અન્ય દેશોની લડાઈની અસર ગ્લોબલ સાઉથ પર પડી રહી છે, તેથી પહેલા ગ્લોબલ સાઉથના મુદ્દાઓ પર ધ્યાન આપવું જોઈએ. જી-20 સમિટના પ્રથમ દિવસે પોતાના સંબોધનમાં મોદીએ જી-20માં ભારત દ્વારા લેવાયેલા “જનકેન્દ્રિત નિર્ણયો”ને આગળ વધારવા માટે બ્રાઝિલના રાષ્ટ્રપતિ પદની પ્રશંસા કરી હતી.
વડાપ્રધાન નરેન્દ્ર મોદીએ બ્રાઝિલમાં જી20 સમિટના મંચથી દુનિયામાં ચાલી રહેલા સંઘર્ષોને કારણે ખતરાની ચેતવણી આપી છે. પીએમ મોદીએ પોતાની ચિંતા વ્યક્ત કરી અને 3Fના સંકટ પર ધ્યાન કેન્દ્રિત કર્યું.
પીએમ મોદીએ કહ્યું કે વૈશ્વિક સંઘર્ષોને કારણે વૈશ્વિક દક્ષિણના દેશો ખાદ્ય, બળતણ અને ખાતર સંકટથી સૌથી વધુ પ્રભાવિત છે અને જી -20 એ તેમની ચિંતાઓ અને પ્રાથમિકતાઓને પ્રાધાન્ય આપવું જોઈએ. ભારત, ચીન, બ્રાઝિલ અને સાઉદી અને કતાર જેવા દેશો ગ્લોબલ સાઉથમાં આવે છે.
પીએમ મોદીએ જી-20 પહેલ ‘ભૂખ અને ગરીબી વિરુદ્ધ લડત’ ને ભારતના સંપૂર્ણ સમર્થનનું વચન આપ્યું હતું. તેમણે એક્સ પર એક પોસ્ટમાં લખ્યું હતું કે, “ભારત આ પ્રયાસને સંપૂર્ણ સમર્થનની ખાતરી આપે છે.”
ભારતની ભૂખ માટે પહેલ
પ્રધાનમંત્રીએ આફ્રિકા અને અન્ય સ્થળોએ ખાદ્ય સુરક્ષાને મજબૂત કરવા ભારત દ્વારા લેવામાં આવેલા પગલાઓની યાદી આપતા કહ્યું હતું કે, “800 મિલિયનથી વધુ લોકોને મફતમાં અનાજ મળી રહ્યું છે, 550 મિલિયન લોકોને હવે વિશ્વની સૌથી મોટી આરોગ્ય વીમા યોજનાનો લાભ મળી રહ્યો છે.” “હવે 70 વર્ષથી વધુ ઉંમરના 60 મિલિયન વરિષ્ઠ નાગરિકો પણ મફત આરોગ્ય વીમો મેળવી શકશે.”
