સમાચાર:
મોરબીમાં વાવડી ચોકડીથી વાવડી ગામ તરફ જતાં માર્ગ ઉપર મહાનગરપાલિકાની ટીમ દ્વારા રોડ પર થયેલા દબાણો સામે કડક કાર્યવાહી હાથ ધરવામાં આવી. આ ઝુંબેશ દરમિયાન રોડ ઉપર કરાયેલા દબાણોને તોડી પાડવામાં આવ્યા હતા. મહાનગરપાલિકા દ્વારા અગાઉથી જ અંદાજે ૫૦ જેટલા દબાણકારોને નોટિસ આપવામાં આવી હતી. નોટિસ બાદ પણ દબાણ દૂર ન કરાતા તંત્રએ ડિમોલિશનની કાર્યવાહી કરી માર્ગને અવરોધમુક્ત બનાવ્યો હતો.
બીજી તરફ, હળવદ શહેરમાં નગરપાલિકા દ્વારા શહેર તથા હાઇવે રોડને દબાણમુક્ત બનાવવા વ્યાપક કાર્યવાહી હાથ ધરવામાં આવી. જિલ્લા કલેક્ટરની સૂચના બાદ હળવદ નગરપાલિકા દ્વારા ૧૫૦થી વધુ પતરાના શેડ સહિતના દબાણકારોને નોટિસ ફટકારવામાં આવી હતી. નોટિસ બાદ દબાણ હટાવવાની કામગીરી શરૂ કરવામાં આવી હતી.
આ સમગ્ર કામગીરી દરમિયાન હળવદ મામલતદાર, નગરપાલિકાના ચીફ ઓફિસર સહિત પોલીસનો પૂરતો બંદોબસ્ત રાખવામાં આવ્યો હતો, જેથી કોઈ અપ્રિય ઘટના ન બને. તંત્રના જણાવ્યા અનુસાર આગામી સમયમાં પણ શહેર અને હાઇવે પર ગેરકાયદે દબાણો સામે આવી જ કડક કાર્યવાહી ચાલુ રહેશે.
