કોંગ્રેસનો આરોપ છે કે જે લોકો વાસ્તવમાં તે વિસ્તારોમાં વસવાટ કરતા નથી, તેમનાં નામ ભાજપના પ્રભાવ હેઠળ મતદાર યાદીમાં દાખલ કરવામાં આવ્યા છે. આ પ્રક્રિયા દ્વારા ચૂંટણીને પ્રભાવિત કરવાનો પ્રયાસ કરવામાં આવ્યો હોવાનો દાવો કરવામાં આવ્યો છે. ખાસ કરીને લઘુમતી સમાજના પ્રભુત્વ ધરાવતા વિસ્તારોમાં આ પ્રકારની એન્ટ્રીઓથી મતદાનના પરિણામ પર અસર પાડવાનો પ્રયાસ થયો હોવાનું કોંગ્રેસનું કહેવું છે.
વશરામ સાગઠીયાએ વધુમાં આક્ષેપ કર્યો છે કે ચૂંટણી દરમિયાન ભય અને ગેરસમજ ફેલાવવા માટે આ નામો ઉમેરવામાં આવ્યા છે, જેથી મતદારોમાં અસુરક્ષા અને ગૂંચવણ ઊભી થાય. તેમણે જિલ્લા પ્રશાસનને આ મામલે તાત્કાલિક તપાસ કરીને યોગ્ય કાર્યવાહી કરવાની માંગ કરી છે.
બીજી તરફ, ભાજપ તરફથી હજુ સુધી આ આક્ષેપો પર સત્તાવાર પ્રતિક્રિયા સામે આવી નથી. જોકે, રાજકીય વર્તુળોમાં આ મુદ્દે ચર્ચા તેજ બની છે અને ચૂંટણી પહેલાં આક્ષેપ-પ્રતિઆક્ષેપનો દોર વધુ તેજ બનવાની શક્યતા વ્યક્ત કરવામાં આવી રહી છે.
મનપાની ચૂંટણી નજીક આવતાં જ આ પ્રકારના આક્ષેપો રાજકીય ગરમાવો વધારતા દેખાઈ રહ્યા છે, અને હવે જિલ્લા પ્રશાસન દ્વારા કરવામાં આવતી કાર્યવાહી પર સૌની નજર ટકેલી છે.
