ચેન્નાઈ સુપર કિંગ્સ IPL 2026 માં પોતાનો પહેલો મુકાબલો 30 માર્ચ, સોમવારના રોજ રાજસ્થાન રોયલ્સ સામે રમશે, પરંતુ ટીમ ધોની વિના રમશે.
IPL 2026 શરૂ થવાના દિવસે, ચાહકોને એક ખરાબ સમાચાર મળ્યા. ચેન્નાઈ સુપર કિંગ્સના ભૂતપૂર્વ કેપ્ટન એમએસ ધોની ટુર્નામેન્ટની શરૂઆતની મેચોમાંથી બહાર થઈ ગયા છે. અહેવાલો અનુસાર, ધોની ઈજાને કારણે IPL 2026 ના પહેલા બે અઠવાડિયા રમી શકશે નહીં, જેના કારણે CSK ને તેના વિના રમવાની ફરજ પડી છે. 28 માર્ચ, શનિવારે સવારે ચેન્નાઈ સુપર કિંગ્સ દ્વારા એક સત્તાવાર નિવેદન જારી કરવામાં આવ્યું હતું, જેમાં ધોનીની ઈજાની વિગતો આપવામાં આવી હતી.
કેટલી મેચોમાંથી બહાર રહેશે?
જો ધોની બે અઠવાડિયા એટલે કે ૧૪ દિવસ સુધી મેદાનની બહાર રહેશે, તો તે ઓછામાં ઓછી ત્રણ મેચ રમી શકશે નહીં. સીએસકેનો પહેલો મુકાબલો ૩૦ માર્ચે ગુવાહાટીમાં રાજસ્થાન રોયલ્સ સામે છે. તેમનો આગામી મુકાબલો ૩ એપ્રિલે ચેન્નાઈમાં પંજાબ કિંગ્સ સામે છે. ટીમ ૫ એપ્રિલે પોતાના હોમ ગ્રાઉન્ડ પર ડિફેન્ડિંગ ચેમ્પિયન રોયલ ચેલેન્જર્સ બેંગ્લોર સામે ત્રીજી મેચ રમશે, આ મેચની બધા લોકો આતુરતાથી રાહ જોઈ રહ્યા છે. ધોની ત્રણેય મેચ રમી શકશે નહીં. તે ૧૧ એપ્રિલે દિલ્હી કેપિટલ્સ સામેની મેચ માટે પાછો ફરી શકે છે.
ધોની ફિટનેસ સાથે સંઘર્ષ કરી રહ્યો છે
ધોની છેલ્લા બે સીઝનથી ફિટનેસ સમસ્યાઓનો સામનો કરી રહ્યો છે. આ સમય દરમિયાન તે ઘૂંટણની ઇજાથી પીડાઈ રહ્યો છે, ઘણીવાર તેને આઈસ પેક પહેરેલો અથવા ઘૂંટણ પર પાટો બાંધેલો જોવા મળ્યો છે. 2024 સીઝન પછી તેની સર્જરી પણ થઈ હતી. પરિણામે, તેની રમવાની ક્ષમતા પર વારંવાર પ્રશ્નો ઉભા થયા છે. ધોનીએ પોતે વારંવાર કહ્યું છે કે વર્ષના 10 મહિના ફિટ રહેવું એ તેનો સૌથી મોટો પડકાર રહ્યો છે.
