ભારતીય રેલવે દ્વારા મુસાફરો માટે ટિકિટ કેન્સલેશનના નિયમોમાં મહત્વપૂર્ણ ફેરફાર કરવામાં આવ્યા છે. નવા નિયમો હેઠળ હવે સમયસર ટિકિટ રદ કરવી વધુ જરૂરી બની ગઈ છે, કારણ કે મોડું કેન્સલ કરવાથી ભારે કપાત કે સંપૂર્ણ રિફંડ ન મળવાની શક્યતા છે.
નવી ગાઇડલાઇન મુજબ, જો મુસાફર ટ્રેનના નિર્ધારિત સમયથી 24 થી 72 કલાક પહેલા ટિકિટ કેન્સલ કરે છે તો કુલ ભાડામાંથી આશરે 25% જેટલી કપાત કરવામાં આવશે. આ નિયમ મુસાફરોને સમયસર નિર્ણય લેવા પ્રોત્સાહિત કરવા માટે લાગુ કરવામાં આવ્યો છે.
જ્યારે ટ્રેનના પ્રસ્થાન સમય પહેલા 8 કલાકની અંદર ટિકિટ કેન્સલ કરવામાં આવે છે, ત્યારે કોઈપણ પ્રકારનું રિફંડ આપવામાં આવતું નથી. આથી છેલ્લી ક્ષણે કેન્સલેશન કરનાર મુસાફરોને સીધી નુકસાન સહન કરવું પડશે.
અગાઉના નિયમોમાં 48 કલાકથી વધુ પહેલા કેન્સલ કરવાથી નક્કી કરેલા ફ્લેટ ચાર્જ લેવામાં આવતા હતા, જ્યારે 48 થી 12 કલાક વચ્ચે 25% અને 12 થી 4 કલાક વચ્ચે 50% સુધીની કપાત થતી હતી. હવે નવા નિયમો વધુ કડક અને સરળ બનાવવામાં આવ્યા છે.
રેલવેના આ નવા નિયમોનો મુખ્ય હેતુ છેલ્લી ક્ષણના કેન્સલેશનને ઘટાડવો અને બેઠકોનો વધુ સારું ઉપયોગ કરવો છે. ખાસ કરીને પ્રીમિયમ ટ્રેનોમાં આ નિયમો વધુ કડક બનાવવામાં આવ્યા છે જેથી મુસાફરી વ્યવસ્થા વધુ કાર્યક્ષમ બને.
આ સિવાય, મુસાફરોને એક નવી સુવિધા પણ આપવામાં આવી છે જેમાં તેઓ ટિકિટ કેન્સલ કર્યા વગર મુસાફરીની તારીખ બદલી શકે છે. આ સુવિધાથી મુસાફરોને રિફંડની ચિંતા કર્યા વગર પોતાના પ્લાનમાં ફેરફાર કરવાની સરળતા મળશે.
આથી હવે મુસાફરો માટે મહત્વપૂર્ણ છે કે તેઓ પોતાના પ્રવાસની યોજના સારી રીતે બનાવી અને સમયસર નિર્ણય લે, જેથી વધારાની કપાત કે નુકસાનથી બચી શકાય.
રેલવે ટિકિટ રદ કરવા નવા નિયમો: હવે મોડું કેન્સલ કરશો તો નહીં મળે રિફંડ!
