જમ્મુ કાશ્મીર કુપવાડા એન્કાઉન્ટર: જમ્મુ અને કાશ્મીરના કુપવાડામાં સુરક્ષા દળો દ્વારા બે આતંકવાદીઓને ઠાર કરવામાં આવ્યા છે. આ આતંકવાદીઓ એલઓસી પર ઘૂસણખોરી કરવાનો પ્રયાસ કરી રહ્યા હતા પરંતુ સેનાએ તેમના પ્રયાસને નિષ્ફળ બનાવ્યો હતો.
સુરક્ષા દળોએ જમ્મુ અને કાશ્મીરના કુપવાડામાં નિયંત્રણ રેખા (એલઓસી) પર ઘૂસણખોરીના પ્રયાસને નિષ્ફળ બનાવ્યો હતો. આ દરમિયાન સુરક્ષાદળોએ બે આતંકીઓને ઠાર કર્યા હતા. આર્મીના ચિનાર કોર્પ્સે ટ્વીટ કરીને આ જાણકારી આપી છે. સેનાએ કહ્યું કે સુરક્ષા દળોએ ચાલુ ઓપરેશનમાં બે આતંકીઓને ઠાર કર્યા છે. આ પહેલા ચિનાર કોર્પ્સે ટ્વિટર પર એક પોસ્ટમાં કહ્યું હતું કે જ્યારે સૈનિકોએ કુપવાડાના ગુગલધરમાં શંકાસ્પદ ગતિવિધિ જોઈ તો તેમણે ગોળીબાર શરૂ કર્યો.
જમ્મુ-કાશ્મીરમાં આતંકવાદીઓને ખતમ કરવા માટે સતત ઓપરેશન ચલાવવામાં આવી રહ્યા છે. આતંકવાદીઓ દરરોજ અહીં ઘૂસણખોરી કરવાનો પ્રયાસ કરે છે અને હંમેશા આતંકવાદી કૃત્યોને અંજામ આપવાનું આયોજન કરે છે. આનો સામનો કરવા માટે સુરક્ષા દળો હંમેશા તૈયાર છે. તાજેતરમાં જ રાજૌરીના થાનામંડી વિસ્તારમાં એન્કાઉન્ટર થયું હતું. અહીં 2 થી 3 આતંકીઓ છુપાયા હોવાના સમાચાર હતા.આ પહેલા જમ્મુ-કાશ્મીર પોલીસના હેડ કોન્સ્ટેબલ બશીર અહેમદ કઠુઆના બિલવાર વિસ્તારમાં એન્કાઉન્ટરમાં શહીદ થયા હતા. આ પહેલા કુલગામમાં બે આતંકીઓ માર્યા ગયા હતા. જો કે આ દરમિયાન જમ્મુ-કાશ્મીર પોલીસના એક અધિકારી સહિત પાંચ સુરક્ષાકર્મીઓ પણ ઘાયલ થયા હતા.
