દેશમાં 2022માં અજાણતાં ઇજાઓને કારણે 4,30,504 અને ઇરાદાપૂર્વકની ઇજાઓને કારણે 1,70,924 મૃત્યુ થયા
માર્ગ અકસ્માતના કારણે સૌથી વધુ ગ્રામીણ વિસ્તારોમાં 67.8 ટકા અને શહેરી વિસ્તારોમાં 32.2 ટકા મૃત્યુ : સ્વાસ્થ્ય મંત્રાલયના નવા રિપોર્ટમાં ખુલાસો થયો
(આઝાદ સંદેશ) નવી દિલ્હી : દેશમાં અજાણતાં થયેલી ઈજાઓથી થતા મૃત્યુનું સૌથી મોટું કારણ માર્ગ અકસ્માતો છે. આરોગ્ય વિભાગના અહેવાલમાં જણાવવામાં આવ્યું છે કે ઇજાઓને કારણે થતા કુલ મૃત્યુના 43 ટકાથી વધુ માટે માર્ગ અકસ્માતો જવાબદાર છે. તે એમ પણ જણાવે છે કે મોટાભાગના માર્ગ અકસ્માતો વધુ ઝડપે વાહન ચલાવવાને કારણે થાય છે. અજાણતાં ઇજાઓ એવી ઘટનાઓનો સંદર્ભ આપે છે જે જાણી જોઈને અથવા ઈરાદાપૂર્વક નથી થતી. જેમાં માર્ગ અકસ્માતો સિવાય ડૂબવું, પડવું અને દાઝવું અને ફૂડ પોઈઝનિંગનો સમાવેશ થાય છે. ઈન્જરી પ્રિવેન્શન એન્ડ સેફ્ટી પ્રમોશન પર અજાણતાં ઈજા નિવારણ માટેની રાષ્ટ્રીય વ્યૂહરચના શીર્ષક હેઠળનો રિપોર્ટ 15મી વર્લ્ડ કોન્ફરન્સ ઓન સેફ્ટી-2024 દરમિયાન લોન્ચ કરવામાં આવ્યો હતો. તે જણાવે છે કે દેશમાં 2022માં અજાણતાં ઇજાઓને કારણે 4,30,504 અને ઇરાદાપૂર્વકની ઇજાઓને કારણે 1,70,924 મૃત્યુ થયા હતા. માર્ગ ટ્રાફિક અકસ્માતો(આરટીઆઈ) 43.7 ટકા સાથે અજાણતાં ઇજાઓનું સૌથી મોટું કારણ છે. અહેવાલમાં જણાવાયું છે કે ડૂબી જવાથી આવા મૃત્યુની ટકાવારી 7.3 થી 9.1 ટકા છે, જ્યારે 4.2 થી 5.5 ટકા પડી જવાને કારણે, 5.6 ટકા ફૂડ પોઇઝનિંગને કારણે અને 6.8 ટકા બળી જવાને કારણે થયા છે. રોડ ટ્રાફિક અકસ્માતોનું વિશ્ર્લેષણ દર્શાવે છે કે શહેરી વિસ્તારો કરતાં ગ્રામીણ વિસ્તારોમાં વધુ નુકસાન થાય છે. જ્યારે ગ્રામીણ વિસ્તારોમાં આરટીઆઈના કારણે મૃત્યુની ટકાવારી 67.8 ટકા છે, ત્યારે શહેરી વિસ્તારોમાં આ આંકડો 32.2 ટકા છે. ડેટા એ પણ દર્શાવે છે કે ખુલ્લા અને રહેણાંક વિસ્તારો જોખમી હોઈ શકે છે. અન્ય સ્થળો કરતાં અહીં મૃત્યુ
દર સંભવિત રીતે વધારે છે. રાષ્ટ્રીય ધોરીમાર્ગો, જે દેશના કુલ માર્ગની લંબાઈના માત્ર 2.1 ટકા હિસ્સો ધરાવે છે, તેમાં સૌથી વધુ અકસ્માતો થાય છે. 2022માં દર 100 કિમીએ 45 લોકોએ જીવ ગુમાવ્યો હતો. અહેવાલમાં એમ જણાવાયું છે કે, આ મૃત્યુનું મુખ્ય કારણ ઓવર-સ્પીડિંગ છે, જે 75.2 ટકા મૃત્યુ માટે જવાબદાર છે. અન્ય મુખ્ય પરિબળોમાં રસ્તાની ખોટી બાજુએ ડ્રાઇવિંગ(5.8 ટકા) અને દારૂ પીને ડ્રાઇવિંગ (2.5 ટકા)નો સમાવેશ થાય છે.
