રાજકોટ જિલ્લામાં એક હૃદયદ્રાવક અકસ્માતની ઘટના સામે આવી છે, જેમાં સગાઈ સમારોહમાંથી પરત ફરી રહેલા દંપતી પર દુર્ઘટનાએ કાળો કહેર વરસાવ્યો હતો. રાજકોટ નજીકના ત્રંબા ગામ પાસે બનેલી આ ઘટનામાં પતિ હેમંતભાઈ મકવાણાનું તેમની પત્નીની આંખો સામે જ કરૂણ મોત નિપજ્યું હતું.
મળતી માહિતી મુજબ, હેમંતભાઈ પોતાની પત્ની સાથે સગાઈના કાર્યક્રમમાં હાજરી આપીને પરત ફરી રહ્યા હતા, ત્યારે ત્રંબા ગામ નજીક અચાનક અકસ્માત સર્જાયો હતો. અકસ્માત એટલો ગંભીર હતો કે હેમંતભાઈને ગંભીર ઇજાઓ પહોંચી હતી અને ઘટનાસ્થળે જ તેમનું મોત થયું હતું. પોતાની આંખો સામે પતિને ગુમાવતાં પત્ની શોકમાં ગરકાવ થઈ ગઈ હતી અને ઘટનાસ્થળે જ રડારડ મચી ગઈ હતી.
ઘટનાની જાણ થતા સ્થાનિક લોકો તરત જ મદદ માટે દોડી આવ્યા હતા અને પોલીસને પણ જાણ કરવામાં આવી હતી. પોલીસ દ્વારા મૃતદેહને પોસ્ટમોર્ટમ માટે ખસેડવામાં આવ્યો હતો અને સમગ્ર મામલે આગળની તપાસ હાથ ધરવામાં આવી છે. આ દુર્ઘટનાએ સમગ્ર વિસ્તારમાં શોકનો માહોલ ફેલાવ્યો છે.
