રાજકોટમાં મતદાન જાગૃતિનો અનોખો સંદેશ: વિરાણી હાઈસ્કૂલમાં વિદ્યાર્થીઓએ બનાવી ‘VOTE’ માનવ આકૃતિ
રાજકોટ શહેરમાં સ્થાનિક સ્વરાજ્ય સંસ્થાઓની ચૂંટણી નજીક આવતાં મતદાન અંગે જાગૃતિ ફેલાવવા વિવિધ કાર્યક્રમો યોજાઈ રહ્યા છે. તે જ અંતર્ગત શહેરની જૂની અને પ્રતિષ્ઠિત વિરાણી હાઈસ્કૂલ ખાતે મતદાન જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમમાં વિદ્યાર્થીઓને લોકશાહીમાં મતદાનનું મહત્વ સમજાવવામાં આવ્યું અને મતદાન પ્રત્યે સકારાત્મક વલણ વિકસાવવા પ્રેરિત કરવામાં આવ્યા.
કાર્યક્રમ દરમિયાન વિદ્યાર્થીઓને મતદાનની ગુપ્તતા જાળવવાની આવશ્યકતા, “મારો મત મારો અધિકાર” જેવી લોકશાહી મૂલ્યોની સમજ આપવામાં આવી. સાથે જ એક મતની કિંમત કેટલી મહત્વપૂર્ણ હોય છે તે અંગે વિસ્તૃત માર્ગદર્શન આપવામાં આવ્યું. શિક્ષકોએ વિદ્યાર્થીઓને સમજાવ્યું કે મતદાન માત્ર અધિકાર જ નહીં, પરંતુ એક જવાબદારી અને ધર્મ પણ છે, જેને નિષ્ઠાપૂર્વક નિભાવવું જોઈએ.
વિદ્યાર્થીઓએ આ અવસર પર પોતાના કુટુંબમાં ૧૦૦ ટકા મતદાન કરાવવાની પ્રતિજ્ઞા લીધી હતી, જે કાર્યક્રમનો મુખ્ય આકર્ષણ બની રહ્યો. આ સાથે વિરાણી હાઈસ્કૂલના મેદાનમાં વિદ્યાર્થીઓ અને શિક્ષકોએ મળીને ‘VOTE’ (મતદાન કરો) શબ્દની વિશાળ માનવ આકૃતિ બનાવી, જેનાથી મતદાન જાગૃતિનો સશક્ત સંદેશ પ્રસર્યો હતો.
આ સમગ્ર કાર્યક્રમ આચાર્ય હરેન્દ્રસિંહ ડોડિયાના માર્ગદર્શન હેઠળ યોજાયો હતો, જેમાં ધોરણ ૯ અને ૧૧ના અંદાજે ૪૦૦ વિદ્યાર્થીઓએ ઉત્સાહભેર ભાગ લીધો હતો. કાર્યક્રમમાં પ્રણવ શુક્લ, જે.એન. સરધારા, આર.એલ. બામટા સહિત અન્ય શિક્ષકો પણ સક્રિય રીતે જોડાયા હતા.
આવો જાગૃતિ કાર્યક્રમ શહેરમાં મતદાન પ્રત્યે જનજાગૃતિ વધારવામાં મહત્વપૂર્ણ સાબિત થઈ રહ્યો છે અને ખાસ કરીને યુવા પેઢીને લોકશાહી પ્રક્રિયામાં જોડવા માટે પ્રેરણાદાયી બની રહ્યો છે.
