એપ્રિલમાં, યુએસ રાષ્ટ્રપતિ ડોનાલ્ડ ટ્રમ્પે ટેરિફ લાદ્યા પછી, ચીને પણ જવાબમાં અમેરિકા પર ટેરિફની જાહેરાત કરી. હવે ચીન સામે અમેરિકાનો ટેરિફ ૧૪૫ ટકા છે જ્યારે ચીને અમેરિકા પર ૧૨૫ ટકા ટેરિફ લાદ્યો છે.
રવિવારે વ્હાઇટ હાઉસે ચીન સાથે વેપાર કરારની જાહેરાત કરી. જોકે, કરાર વિશે તાત્કાલિક માહિતી આપવામાં આવી ન હતી. યુએસ ટ્રેઝરી સેક્રેટરી સ્કોટ બેસન્ટ કહે છે કે ચીન સાથેની બેઠકો બાદ તેઓ એક કરાર પર પહોંચ્યા છે. તેમણે કહ્યું કે આનાથી અમેરિકા તેની વેપાર ખાધ ઘટાડી શકશે. જોકે, તેમણે કરાર વિશે વધુ માહિતી આપી ન હતી.
અમેરિકાના રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર લખ્યું હતું કે મોટી પ્રગતિ થઈ રહી છે. જીનીવામાં ચર્ચાના બીજા અને અંતિમ દિવસે ચીન અને અમેરિકા વાટાઘાટો કરી રહ્યા છે. બેઇજિંગે હજુ સુધી સીધું નિવેદન બહાર પાડ્યું નથી, પરંતુ તેની સત્તાવાર સમાચાર એજન્સીએ કડક વલણ અપનાવ્યું છે, અને કહ્યું છે કે ચીન “કોઈપણ દરખાસ્તને નકારી કાઢશે જે મુખ્ય સિદ્ધાંતો પર સમાધાન કરવા દબાણ કરે છે અથવા વૈશ્વિક સમાનતાના વ્યાપક ઉદ્દેશ્યને નબળી પાડે છે.”
યુએસ ટ્રેઝરી સેક્રેટરી સ્કોટ બેસન્ટ અને યુએસ ટ્રેડ રિપ્રેઝન્ટેટિવ જેમીસન ગ્રીરે ચીનના વાઇસ પ્રીમિયર હી લાઇફેંગના નેતૃત્વમાં ચીની પ્રતિનિધિમંડળ સાથે વાતચીત કરી. આ વાતચીતમાંથી કોઈ મોટા પરિણામની આશા ઓછી છે, પરંતુ એવું માનવામાં આવે છે કે બંને દેશો મોટી જકાત ઘટાડી શકે છે. જો આવું થાય છે, તો તે વિશ્વભરના નાણાકીય બજારો અને યુએસ-ચીન વેપાર પર નિર્ભર કંપનીઓને રાહત આપશે.
