આરોપી એચ.આર. હેડ નાસીને પ્રથમ દુબઇ, ત્યાંથી થાઈલેન્ડ અને ત્યાંથી નેપાળ ગયા બાદ ભારતમાં પ્રવેશતાં જ દબોચી લેવાયો
(આઝાદ સંદેશ),રાજકોટ: જામનગરના ક્રેડિટ બુલ્સ ઇન્વેસ્ટમેન્ટના 23 કરોડના કૌભાંડમાં સંડોવાયેલો અને નાસતો ફરતો એક આરોપી નેપાળ બોર્ડર પરથી જામનગર પોલીસના હાથે ઝડપાયો છે. કૌભાંડમાં સંડોવાયેલો આરોપી નાસી છૂટીને સૌપ્રથમ દુબઈ ગયો હતો, ત્યાંથી થાઈલેન્ડ ગયા બાદ નેપાળ આવ્યો હતો અને નેપાળથી ભારતમાં ઘૂસવાની પેરવી કરતો હતો ત્યારે દબોચી લેવાયો હતો.
મળતી માહિતી મુજબ જામનગરનાં સિટી-બી ડિવિઝન પોલીસ મથકમા નોંધાયેલ ગુનામા નાસ્તા ફરતા આરોપી ધવલ દીનેશભાઈ સોલાણી અને યશ દીનેશભાઈ સોલાણીની શોધ-ખોળ કરતાં બન્ને આરોપીઓ વિદેશ નાસી ગયા હોવાનું જાણવા મળ્યું હતું. આ કેસમા અગાઉ મુખ્ય આરોપીઓ પકડાઈ ગયો હતો, અને હાલ તે જેલ હવાલે છે.
આ સમય દરમ્યાન હાલના આરોપી યશ વિરૂધ્ધ સી.આર.પી.સી. કલમ 70 મુજબના વોરંટમા નાસ્તો ફરતો હોય જે આરોપીની તપાસમાં સર્વેલન્સ સ્ટાફ પ્રયત્નશીલ હતા તથા તપાસ દરમ્યાન બાતમી મળી હતી કે આરોપી યશ દિનેશભાઈ સોલાણી પ્રથમ દુબઈ અને ત્યાથી થાઈલેન્ડ નાસી ગયો છે. થાઈલેન્ડથી નેપાળ અને નેપાળથી કોઈપણ રાજ્યના બોર્ડરથી ભારતમાં પ્રવેશ કરવાનો પ્લાન કરી રહ્યો હોવાની માહિતીના આધારે પોલીસે વધુ હકીકત મેળવી હતી કે નેપાળ રકસોલ બોર્ડરથી આરોપી ભારતમાં પરત આવવાનો છે, જેથી તે આરોપીને પકડવા માટે જામનગર પોલીસની એક ટીમ તૈયાર કરી રકસોલ બોર્ડર (બિહાર) ખાતે આરોપીની તપાસમાં મોકલવામા આવી હતી.
તપાસમાં ગયેલ ટીમ નેપાળથી ભારતમાં પ્રવેશ કરવાના ચેક પોસ્ટ પર વોચમાં હતી તે દરમ્યાન આરોપી નેપાળથી ભારતમાં આવતા તુરત જ તેને પકડી નામ પુછતા યશ દીનેશભાઈ સોલાણી (રહે.પટેલ કોલોની, 11/2 વ્રજમંગલ એપાર્ટમેન્ટ રૂમ નં 805 જામનગર)હોવાનુ જણાવતા તપાસમાં ગયેલ ટીમે તેને હસ્તગત કરી મૌખીક પુછપરછ કરતાં પોતે ક્રેડીટ બુલ્સ કંપનીમાં .એચ.આર.હેડ હોવાનું જણાવ્યું હતું, અને ગુનાની કબુલાત આપતાં કાયદેસરની કાર્યવાહી કરવામાં આવી હતી. તેની ધરપકડ કરી જી.પી.આઈ.ડી. સ્પેશીયલ કોર્ટમા રજુ કરતાં આરોપીનાં ચાસ દિવસ ના પોલીસ રીમાંડ મંજૂર થયા છે. અગાઉ આ કેસમા આરેપી પંકજભાઈ પ્રવીણભાઈ વડગામા (બ્રાંચ હેડ) અને ફરઝાના ઈમરાન શેખ પકડાઈ ચુક્યા છે અને હાલ જેલમાં છે, જ્યારે આ કેસમા વધુ એક આરોપી ઝડપાયો છે.
