ભારતને માર્ચ મહિનામાં વધુ એક ટાઇટલ જીતવાની તક છે. ખરેખર, આંતરરાષ્ટ્રીય માસ્ટર્સ લીગ ટી -20 ની ફાઇનલ માટે બંને ટીમો નક્કી કરવામાં આવી છે. આ મુકાબલામાં ઈન્ડિયા માસ્ટર્સનો મુકાબલો વિન્ડિઝની માસ્ટર્સ ટીમ સામે થશે.
ભારત તાજેતરમાં જ ચેમ્પિયન્સ ટ્રોફી 2025નું ચેમ્પિયન બન્યું હતું. આ ટૂર્નામેન્ટમાં ટીમ ઇન્ડિયાએ ફાઇનલમાં ન્યૂઝીલેન્ડને હરાવીને ટ્રોફી જીતી લીધી હતી. હવે ભારતીય ક્રિકેટ ચાહકોને ફરી એકવાર ઉજવણી કરવાની તક મળી છે. ખરેખર, ભારતમાં રમાઈ રહેલી ઈન્ટરનેશનલ માસ્ટર્સ લીગ ટી-20 તેના અંતિમ પડાવ પર પહોંચી ગઈ છે. આ લીગની આખરી મેચમાં ઈન્ડિયા માસ્ટર્સનો મુકાબલો વિન્ડિઝ માસ્ટર્સ સામે થશે. આ લીગમાં તમામ લેજન્ડ ક્રિકેટરો રમી રહ્યા છે, જેમાં મહાન સચિન તેંડુલકરનું નામ પણ સામેલ છે.
ભારત પાસે વધુ એક ટાઇટલ જીતવાની તક
આંતરરાષ્ટ્રીય માસ્ટર્સ લીગ ટી20 2025માં કુલ 5 દેશોએ ભાગ લીધો હતો. ભારત માસ્ટર્સ ઓસ્ટ્રેલિયાને હરાવીને ફાઇનલમાં પહોંચ્યું હતું. તે જ સમયે, વેસ્ટ ઇન્ડીઝ માસ્ટર્સે લીગની બીજી સેમિ ફાઇનલમાં શ્રીલંકા માસ્ટર્સ ટીમ સામે રોમાંચક જીત નોંધાવી હતી અને ફાઇનલમાં પોતાનું સ્થાન બનાવ્યું હતું. હવે બંને ટીમો વચ્ચે આ ફાઇનલ મેચ 16 માર્ચે રમાશે. રાયપુરના શહીદ વીર નારાયણ સિંહ ઈન્ટરનેશનલ સ્ટેડિયમમાં બંને ટીમો આમને-સામને ટકરાશે. આ મેચ ભારતીય સમયાનુસાર સાંજે 7:30 વાગ્યાથી રમાશે.
વેસ્ટ ઇન્ડીઝ માસ્ટર્સે રોમાંચક જીત નોંધાવી
વેસ્ટ ઈન્ડિઝ માસ્ટર્સ અને શ્રીલંકા માસ્ટર્સની ટીમો વચ્ચેની આ સેમિ ફાઈનલ મેચ શહીદ વીર નારાયણ સિંઘ ઈન્ટરનેશનલ સ્ટેડિયમમાં રમાઈ હતી. જ્યાં ફેન્સને કાંટાની ટક્કર જોવા મળી હતી. શ્રીલંકા માસ્ટર્સે મેચમાં ટોસ જીતીને પ્રથમ બોલિંગ કરવાનો નિર્ણય કર્યો હતો. પ્રથમ બેટિંગ કરતા વેસ્ટ ઈન્ડિઝ માસ્ટર્સ ટીમે 20 ઓવરમાં 5 વિકેટના નુકસાન પર 179 રન બનાવ્યા હતા. આ દરમિયાન કેપ્ટન બ્રાયન લારાએ 33 બોલમાં 41 રન બનાવ્યા હતા, પરંતુ તે રિટાયર્ડ હર્ટ થયો હતો. તેમના સિવાય દેનેશ રામદીને 22 બોલમાં અણનમ 50 રન બનાવ્યા હતા. ચેડવિક વોલ્ટને પણ 20 બોલમાં 31 રનનું યોગદાન આપ્યું હતું.
બીજી તરફ શ્રીલંકા માસ્ટર્સ ટીમ લક્ષ્યનો પીછો કરતી વખતે 20 ઓવરમાં 9 વિકેટના નુકસાન પર 173 રન જ બનાવી શકી હતી. શ્રીલંકા તરફથી અસેલા ગુણારત્નેએ સૌથી વધુ 66 રનનો સ્કોર બનાવ્યો હતો. આ સાથે જ ઉપુલ થરંગાએ 30 રન બનાવ્યા હતા. પરંતુ આ સિવાય કોઈ પણ બેટ્સમેન 30 રનના આંકડાને સ્પર્શી શક્યો નહતો. ટીનો બેસ્ટ આ મેચમાં વેસ્ટ ઇન્ડીઝનો સૌથી સફળ બોલર રહ્યો હતો. તેણે કુલ 4 બેટ્સમેનોને પોતાના શિકાર બનાવ્યા હતા. ડ્વેન સ્મિથ પણ 2 વિકેટ લેવામાં સફળ રહ્યો હતો.
