નવી દિલ્હી : દિલ્હી હાઈકોર્ટે એરક્રાફ્ટ લીઝિંગ કંપનીઓની અરજી પર સુનાવણી કરતા ગયા અઠવાડિયે પોતાનો નિર્ણય સંભળાવ્યો હતો, જેના પછી એરક્રાફ્ટનું રજીસ્ટ્રેશન રદ્દ કરવામાં આવ્યું છે… નાદારીની પ્રક્રિયામાંથી પસાર થઈ રહેલી એવિએશન કંપની ગો ફર્સ્ટને મોટો ઝટકો લાગ્યો છે. કોર્ટના તાજેતરના આદેશ બાદ, ગો ફર્સ્ટના તમામ 54 એરક્રાફ્ટનું રજીસ્ટ્રેશન રદ કરવામાં આવ્યું છે. મતલબ કે હવે ગો ફર્સ્ટના કાફલામાં એક પણ વિમાન બચ્યું નથી.
હાઈકોર્ટે આ આદેશ આપ્યો હતો : દિલ્હી હાઈકોર્ટના આદેશ બાદ, ડાયરેક્ટર જનરલ ઓફ સિવિલ એવિએશન (DGCA) એ ગો ફર્સ્ટના તમામ 54 પ્લેનનું રજીસ્ટ્રેશન રદ કરી દીધું છે. દિલ્હી હાઈકોર્ટે ગયા અઠવાડિયે આ અંગે પોતાનો નિર્ણય સંભળાવ્યો હતો અને એવિએશન રેગ્યુલેટર ડીજીસીએને 5 દિવસમાં નિર્ણય લાગુ કરવા જણાવ્યું હતું. નિર્ણયને અમલમાં મૂકતા, DGCAએ બુધવારે તમામ 54 ગો ફર્સ્ટ એરક્રાફ્ટનું રજિસ્ટ્રેશન રદ કર્યું.
તેમને વિમાનોનો કબજો મળશે : વિવિધ એરક્રાફ્ટ લીઝિંગ કંપનીઓએ આ એરક્રાફ્ટનું રજીસ્ટ્રેશન રદ કરવાની માંગ કરી હતી. આ માટે 14 લીઝિંગ કંપનીઓએ ગયા વર્ષે દિલ્હી હાઈકોર્ટનો સંપર્ક કર્યો હતો. ગયા સપ્તાહના નિર્ણય બાદ એરક્રાફ્ટ લીઝિંગ કંપનીઓને રાહત મળી છે. ગો ફર્સ્ટનું રજીસ્ટ્રેશન પૂરું થયા બાદ હવે લીઝિંગ કંપનીઓ વિમાનો પર નિયંત્રણ મેળવી શકશે.
આ કંપનીઓએ અપીલ કરી હતી : જે લીઝિંગ કંપનીઓએ ગયા વર્ષે દિલ્હી હાઈકોર્ટનો સંપર્ક કર્યો હતો તેમાં SMBC એવિએશન કેપિટલ લિમિટેડ, સ્કાય લીઝિંગ, GY એવિએશન લીઝ, ACG એરક્રાફ્ટ લીઝિંગ, BOC એવિએશન અને ચાઈના ડેવલપમેન્ટ બેંક ફાઈનાન્સિયલ લીઝિંગ કંપનીનો સમાવેશ થાય છે.
ત્રણ વાર એક્સટેન્શન મેળવ્યું : એવિએશન કંપની ગો ફર્સ્ટ હાલમાં નાદારીની પ્રક્રિયામાંથી પસાર થઈ રહી છે. ગો ફર્સ્ટે બરાબર એક વર્ષ પહેલા એટલે કે 2 મે 2023ના રોજ પોતાની જાતે નાદારી માટે અરજી કરવાની માહિતી આપી હતી. NCLTએ ગયા મહિને નાદારીની પ્રક્રિયામાં ફરી એક નવું વિસ્તરણ આપ્યું છે. NCLTએ આ ત્રીજું એક્સટેન્શન 8 એપ્રિલે આપ્યું છે, જે 60 દિવસ માટે છે.
